ուրբաթ, 11 սեպտեմբերի 2009
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր Սիմոնյանը։
Հանձնաժողովը քննարկել է 15 բարեգործական ծրագիր։ Մասնավորապես, քննարկվել և հաստատվել են «Հայաստան» համահայկական հիմնադրամի կողմից իրականացվող «Հայաստանի Հանրապետության Տավուշի մարզի Ազատամուտ գյուղի դպրոցում կաթի ընդունման կետի կազմակերպում» և «Հայաստանի Հանրապետության Տավուշի մարզի սահմանամերձ գյուղերի ոռոգման ներքին ցանցի նախագծում», Մայր Աթոռ Սուրբ Էջմիածնի կողմից իրականացվող «Երևանի Էրեբունու թաղամասի եկեղեցու կառուցման շինարարական աշխատանքների համար բազալտե բլոկների ձեռքբերում» և «Գանձատան ջեռուցման, ջրամատակարարման և ջրահեռացման համակարգերի վերակառուցման աշխատանքների իրականացում», ՀՀ առողջապահության նախարարության «Հայաստանի Հանրապետությունում տուբերկուլյոզի դեմ պայքարի ազգային ծրագրի ուժեղացում» դրամաշնորհային և «Մատենադարան» հիմնադրամի կողմից իրականացվող Մատենադարանի նոր մասնաշենքի կառուցման շինարարական աշխատանքների 3-րդ փուլի ծրագրերը։
Քննարկվել և հաստատվել են նաև «Վորլդ Վիժն Ինտերնեյշնլ» միջազգայյին բարեգործական կազմակերպության կողմից իրականացվող «Սյունիքի մարզի Կապան քաղաքի Սարահարթ թաղամասի N4 նախակրթարանի մասնակի վերանորոգում», «Սյունիքի մարզի Կապան քաղաքի Ծղարշիկ թաղամասի N8 դպրոցի սանհանգույցի վերանորոգում», «Սյունիքի մարզի Արծվանիկ համայնքում մանկական խաղահրապարակի կառուցում և կահավորում խաղասարքերով», «Գեղարքունիքի մարզի Գավառի տարածաշրջանի Սարուխանի N1, Լանջաղբյուրի և Ծովազարդի մանկապարտեզներում խաղահրապարակների տեղադրում», «Բարեգործական բեռների ներմուծում և անհատույց բաշխում Ալավերդու տարածաշրջանում», «Լոռու մարզի Յաղդան և Հոբարձի համայնքների համար խաղահրապարակների ձեռքբերում» և «Գեղարքունիքի մարզի Գավառի տարածաշրջանի Գանձակ, Ծաղկաշեն, Սարուխան, Լանջաղբյուր, Գեղարքունիք, Բերդկունք, Հայրավանք, Ծովազարդ գյուղերի երեխաների համար քրիստոնեական ամառային ճամբարի անցկացում» ծրագրերը։
Հանձնաժողովի օրակարգում ընդգրկված և նիստով հաստատված հարցերի թվում են «Օթևան» երիտասարդ մարդկանց քրիստոնեական ասոցիացիա» հասարակական կազմակերպության կողմից իրականացվող «Հայաստանի Հանրապետության Սյունիքի մարզի Գորիս քաղաքի հենակետային վարժարան դպրոցի շենքի պատուհանների պատրաստում և տեղադրում» և «Նյու Լայֆ Արմենիա» բարեգործական հիմնադրամի կողմից իրականացվող բեռների ներմուծման և անհատույց բաշխման ծրագրերը։
Նիստում քննարկվել և հավանություն է տվել նաև նախկինում հաստատված ծրագրերի շրջանակում իրականացվող հարակից գործարքներին և տարբեր կազմակերպությունների հասցեներով ուղարկված բարեգործական բեռների ներմուծման ծրագրերին։
