չորեքշաբթի, 7 մայիսի 2003
Այսօր ՀՀ վարչապետ Անդրանիկ Մարգարյանն ընդունել է Իրանի Իսլամական Հանրապետության գիտության, հետազոտությունների և տեխնոլոգիաների նախարար Մոստաֆա Մոինին և նրա գլխավորած պատվիրակությանը:
Գոհունակություն հայտնելով կրթության և գիտության ոլորտներում հայ-իրանական հարաբերությունների ներկայիս բարձր մակարդակից, վարչապետը նշել է, որ դա պայմանավորված է ոչ միայն մեր ժողովուրդների դարավոր բարեկամությամբ, հոգևոր, մշակութային կապերով, այլև երկու պետությունների կողմից կրթության և գիտության զարգացմանը ցուցաբերվող մեծ ուշադրությամբ: Նա հավաստել է, որ Հայաստանի կառավարությունը պատրաստակամ է այսուհետ ևս շարունակելու աջակցությունը նշված ոլորտների զարգացմանն ուղղված նախաձեռնություններին:
Նախարար Մոստաֆա Մոինը նույնպես վկայել է կրթության և գիտության բնագավառներում հայ-իրանական հարաբերությունների վերընթաց զարգացման փաստը: Նա ընդգծել է, որ Հայաստանի բուհերում իրանցի մեծ թվով ուսանողներ են սովորում և գոհունակություն հայտնել նրանց ուսման և կենցաղի համար ստեղծված պայմաններից: Նա հավաստել է, որ նույն պայմաններն ստեղծված են նաև Իրանի Հանրապետությունում սովորող հայ ուսանողների համար: Ըստ նրա, այսօր արդեն բարենպաստ դաշտ կա նաև գիտության ոլորտում համատեղ ծրագրերի իրականացման համար: Պարոն Մոինը և վարչապետ Անդրանիկ Մարգարյանը գիտական համագործակցության առաջնային բնագավառներ են համարել մասնավորապես նոր տեխնոլոգիաների փոխանակումը, միմյանց գիտական ներուժին, կարողություններին ու հնարավորություններին ծանոթացումը, համատեղ գիտական նախագծերի մշակումն ու իրագործումը: Կողմերը Հայաստանի և Իրանի կառավարությունների կողմից կրթության և գիտության ոլորտներում համագործակցության հետագա խորացման կամքի ապացույց են համարել նախարար Մոստաֆա Մոինի այցի ընթացքում ստորագրվելիք 2002-2005թթ. երկկողմ գործակցության գործնական ծրագիրը:
Հանդիպման ավարտին պարոն Մոստաֆա Մոիմը վարչապետ Անդրանիկ Մարգարյանին հրավիրել է մասնակցելու հաջորդ տարի Նոր Ջուղայի 400-ամյակին նվիրված հանդիսություններին:
