Հայաստանի Հանրապետության Կառավարություն

Այսօր տեղի է ունեցել «Հազարամյակի մարտահրավեր» հիմնադրամ-Հայաստան» ՊՈԱԿ-ի կառավարման խորհրդի հերթական նիստը, որը վարել է խորհրդի նախագահ, ՀՀ վարչապետ Տիգրան Սարգսյանը։
Կառավարման խորհուրդը քննարկել է «Հազարամյակի մարտահրավեր» - Հայաստան ծրագրի գյուղական ճանապարհների վերականգնում ենթածրագրի դադարեցման վերաբերյալ «Հազարամյակի մարտահրավեր» կորպորացիայի (ՀՄԿ) նամակից բխող ՀՄՀ-Հայաստան ՊՈԱԿ-ի հետագա քայլերի մասին հարցը։
«ՀՄՀ-Հայաստան» ՊՈԱԿ-ի գլխավոր գործադիր տնօրեն Արա Հովսեփյանը նշել է, որ ԳՃՎ ենթածրագրի դադարեցման մասին ծանուցումը ենթադրում է աշխատանքներում ընդգրկված խորհրդատուների և կապալառուների իրազեկում և պայմանագրերի դադարեցում, ՀՄՀ-Հայաստան ՊՈԱԿ-ի կառուցվածքի փոփոխություն, առկա միջոցների և պարտավորությունների հանձնում համապատասխան լիազոր մարմնին։
Կառավարման խորհուրդը հավանություն է տվել պայմանագրերի դադարեցմանը։ ՀՀ վարչապետը նշել է, որ պայմանագրերով անավարտ մնացած շինարարական աշխատանքները կբերվեն տրամաբանական ավարտի ՀՀ կառավարության կողմից համապատասխան այլ ֆինանսական աղբյուրներ հայթայթելուց հետո։
Խորհուրդը քննարկել և հաստատել է «ՀՄՀ-Հայաստան» ծրագրի Ոռոգվող գյուղատնտեսության ենթածրագրի շրջանակում Այգեզարդի, Շենիկի և Մանթաշի ինքնահոս համակարգերի վերաբնակեցման գործողությունների պլանները և դրանց իրականացման քայլերը, որոնք ներառում են օտարվող սեփականության սեփականատերերի ու օտարվող սեփականության նկատմամբ գույքային իրավունքներ ունեցողների պատշաճ տեղեկացում և համապատասխան փոխհատուցման վճարում, սեփականության օտարման պայմանագրի նախագծի տրամադրում, պայմանագրերի կնքում և այլն։ Նախատեսված գործողությունների իրականացումը հնարավորություն կտա ժամանակին ավարտել Այգեզարդի, Շենիկի և Մանթաշի ինքնահոս համակարգերի կառուցումը։
Կառավարման խորհուրդը քննարկել է նաև ասֆալտբետոնային և ցեմենտբետոնային ճանապարհային ծածկերի կառուցման ծախսերի վերլուծական համեմատության վերաբերյալ տեղեկատվությունը, մասնագիտական այլ հաշվետվություններ և քննարկել ընթացիկ այլ հարցեր։
Շահառուների խորհրդի ներկայացուցիչների կողմից բարձրացվել են մի շարք կարևոր խնդիրներ ՀՄՀ ծրագրի իրականացման վերաբերյալ, որի շուրջ ծավալվել է քննարկում և տրվել համապատասխան հանձնարարականներ։