ուրբաթ, 3 հուլիսի 2009
ՀՀ վարչապետ Տիգրան Սարգսյանն այսօր ընդունել է Թաիլանդի Թագավորությունում գտնվող միջազգային ճանաչում ունեցող «Ռեգենտ» դպրոցի հիմնադիր նախագահ դոկտոր Վիրաչայ Տեչավիչիտիին։
Ողջունելով հյուրին, ՀՀ վարչապետն իր գոհունակությունն է հայտնել կրթական ոլորտում մեր երկրին ցուցաբերած օժանդակության համար։ 2006թ. «Ռեգենտ» դպրոցի և ՀՀ գիտության և կրթության նախարարության միջև կնքված համաձայնագիրը հնարավորություն է տալիս տարբեր տարիքային խմբերի ուսանողներին ստանալ համալսարանական կրթություն, իսկ հետագայում ուսումնառությունը շարունակել աշխարհի լավագույն համալսարաններում։ Տիգրան Սարգսյանը նշել է, որ կրթական համակարգի բարեփոխումները ՀՀ կառավարության համար ունի սկզբունքային նշանակություն և գործունեության առաջնահերթություններից մեկն է։
Դոկտոր Վիրաչայ Տեչավիչիտին ՀՀ կառավարության ղեկավարին է ներկայացրել կրթության բնագավառում Հայաստանի հետ համագործակցության զարգացմանն առնչվող հարցեր։
Հանդիպման ավարտին ապագա հայ առաջնորդների կրթության ու դաստիարակության գործում ներդրած ակնառու ավանդի և ունեցած վաստակի համար դոկտոր Վիրաչայ Տեչավիչիտին խրախուսվել է ՀՀ վարչապետի շնորհակալագրով։
