ուրբաթ, 11 ապրիլի 2003
Այսօր տեղի է ունեցել ՀՀ վարչապետին կից կանանց հարցերով խորհրդի նիստ: Քննարկվել են խորհրդի նախորդ նիստի հանձնարարականի արդյունքում ձևավորված վեց աշխատանքային խմբերի 2003 թ. ծրագրերի նախագծերը: Մշակութային, կրթական, սոցիալական, առողջապահական հարցերի, գործարար կանանց աջակցության, պետական մարմինների և հասարակական կազմակերպությունների փոխհարաբերությունն ուսումնասիրող աշխատանքային խմբերի ղեկավարների ներկայացրած տարեկան միջոցառումներում տեղ են գտել բնակչության աղքատ խմբերի համար հիվանդանոցային բուժօգնության մատչելիության ապահովման, կանանց և երեխաների առողջության պահպանման, ընտանիքի ամրապնդման, ուսուցիչների սոցիալական վիճակի բարելավման, մշակույթի ոլորտի կանանց համահայկական հավաքի կազմակերպման, գործարար կանանց աջակցության և այլ խնդիրներ:
Կարևորելով առաջարկվող միջոցառումների իրատեսականությունը, վարչապետ Անդրանիկ Մարգարյանը նշել է, որ դրանք պետք է լինեն ֆինանսապես հիմնավորված, իրագործման հստակ մեխանիզմների ու ժամկետների մատնանշմամբ: Վարչապետը հանձնարարել է աշխատանքային խմբերին՝ մինչև ապրիլի վերջը կարծիքներ ներկայացնել առաջարկված ծրագրերի վերաբերյալ, որոնք խորհրդում ամփոփվելուց հետո կներկայացվեն նախարարություններին՝ նախատեսված միջոցառումների իրականացման ֆինանսական հնարավորությունները պարզելու համար:
Նիստում խորհրդի անդամները շնորհավորեցին Ռոզա Ծառուկյանին և Նաիրա Մարտիրոսյանին՝ ՄԱԿ-ի Եվրոպայի տնտեսական հանձնաժողովի կողմից անցկացված «2002 թ. լավագույն գործարար կանայք» մրցույթում հաղթող ճանաչվելու համար:
