երեքշաբթի, 2 հունիսի 2009
ՀՀ վարչապետ Տիգրան Սարգսյանն այսօր ընդունել է Սիրիայի Արաբական Հանրապետության արտաքին գործերի նախարար Ուալիդ ալ-Մուալլիմին։
Ողջունելով հյուրին Հայաստան կատարած առաջին այցի կապակցությամբ, ՀՀ վարչապետ Տիգրան Սարգսյանը նշել է, որ Հայաստանի և Սիրիայի ժողովուրդների միջև առկա ջերմ հարաբերությունների համար ամուր հիմք են հանդիսանում պատմամշակութային ընդհանրությունները և դարավոր բարեկամությունը։ Զրույցի ընթացքում ընդգծվել են Առևտրաարդյունաբերական պալատների միջև շփումների ակտիվացումը` առևտրատնտեսական հարաբերությունների զարգացման ուղղությամբ, տարածաշրջանային համատեղ ծրագրերի իրականացումը, երկու երկրների բանկային ոլորտում մասնագիտական փորձի փոխանակումն ու ներդրումների խրախուսումը, ինչպես նաև գործարարների երկկողմ շփումների, բիզնես ֆորումների կազմակերպման անհրաժեշտությունը։
Սիրիայի Արաբական Հանրապետության արտաքին գործերի նախարարը, կարևորելով Սիրիայի նախագահ Բաշշար ալ-Ասադի առաջիկա այցը Հայաստան և մեր երկրում Սիրիայի մշակույթի օրերի անցկացումը, խոսել է տարբեր բնագավառներում համագործակցության զարգացման հնարավորությունների մասին, ՀՀ վարչապետին փոխանցել Սիրիայի վարչապետի հրավերը։
ՀՀ վարչապետ Տիգրան Սարգսյանն իր ողջույնն է փոխանցել Սիրիայի Արաբական Հանրապետության վարչապետ Նաջի Օտրիին և շնորհակալություն հայտնել հրավերի համար։
