Հայաստանի Հանրապետության Կառավարություն

ՀՀ վարչապետ Տիգրան Սարգսյանն այսօր` ՀՀ էկոնոմիկայի, էներգետիկայի և բնական պաշարների նախարարների, ՀՀ կառավարության աշխատակազմի ղեկավարի ուղեկցությամբ, այցելել է «Նաիրիտ գործարան» ՓԲԸ, շրջել արտադրամասերում, ծանոթացել արտադրական ներկա կարողություններին և գործարանի զարգացման հնարավորություններին։
Վարչապետը գոհունակությամբ է նշել, որ այսօր «Նաիրիտ»-ն աշխատում է, արտադրում է կաուչուկ, և այժմ առաջնահերթ խնդիրը գործարանի իրական կարողությունների պարզումն ու արտադրողականության ավելացումն է, մասնավորապես, մինչև տարեվերջ բութադիենային տեխնոլոգիայով ևս կաուչուկի արտադրության կազմակերպումը։ Տիգրան Սարգսյանն ընդգծել է, որ «Նաիրիտ»-ը զարգացման մեծ հնարավորություններ ունի` ոչ միայն կաուչուկի, այլև բազմաթիվ այլ արտադրատեսակների գծով, և եթե, մշակված զարգացման ծրագրին համապատասխան, աշխատի իր ամբողջ հզորությամբ, կնպաստի նաև տասնյակ ձեռնարկությունների արագ թափով գործարկմանը, հազարավոր աշխատատեղերի ստեղծմանը։ «Նաիրիտ»-ի առջև կանգնած հիմնախնդիրների թվում, վարչապետը կարևորել է նաև բարձր որակավորում ունեցող մասնագետներով ապահովումը։
«Նաիրիտ»-ը պետության համար ունի էական նշանակություն, որովհետև «Նաիրիտ»-ով մեր արդյունաբերությունը բոլորովին այլ դիմագիծ է ստանում ժողովրդական տնտեսության կառուցվածքում։ Սա կառուցվածքաստեղծ գործարան է, նրա աշխատանքը մեծ թափ է հաղորդում քիմիական արդյունաբերությանը, որովհետև «Նաիրիտ»-ի հետ միասին զարգանում է գիտությունը, մենք կարողանում ենք նոր տեխնոլոգիաներ ներդնել, նոր արտադրություններ կազմակերպել, տարբեր տիպի նոր ձեռնարկություններ կարող են ստեղծվել։ Ընդհանրապես, քիմիական արդյունաբերությունը հեռանկարային ճյուղ է Հայաստանի համար, իսկ առանց «Նաիրիտ»-ի քիմիական արդյունաբերության մեջ չենք կարող բեկումնային ծրագրեր իրականացնել։ Այդ պատճառով էլ «Նաիրիտ»-ը պետության համար ունի էական նշանակություն», - ասել է վարչապետը։