երկուշաբթի, 20 ապրիլի 2009
ՀՀ վարչապետ Տիգրան Սարգսյանն այսօր ընդունել է Համաշխարհային բանկի խմբի անդամ Միջազգային ֆինանսական կորպորացիայի (IFC) պատվիրակությանը` ՀԲ խմբի անդամ FIAS-ի Գործարարության աջակցության բարեփոխումների բաժնի գլխավոր տնտեսագետ Ստեֆկա Սլավովայի գլխավորությամբ։
Տիկին Սլավովան տեղեկացրել է, որ պատվիրակությունը Հայաստան է ժամանել` ՀՀ կառավարության առաջարկով «Հայաստանում գործարարությամբ զբաղվելու բարեփոխումներ» ծրագրի իրականացման ընթացքին ծանոթանալու և հետագա անելիքները ծրագրելու նպատակով։ Նա նշել է, որ այցի շրջանակներում պատվիրակությունն արդեն իսկ մի շարք արդյունավետ հանդիպումներ է ունեցել ՀՀ էկոնոմիկայի, ֆինանսների, քաղաքաշինության և այլ նախարարություններում ու գերատեսչություններում, քննարկել հարկային և մաքսային վարչարարության, գործարարություն սկսելու, շինարարական թույլտվությունների և այլ ոլորտներում իրականացվող բարեփոխումները,որոնք հիմնականում դրական է գնահատել։ Միաժամանակ, նա անդրադարձել է դեռևս չլուծված կամ լուծման ընթացքում գտնվող հարցերին, ներկայացրել պատվիրակության դիտողություններն ու առաջարկությունները։ Ստեֆկա Սլավովան ընդգծել է, մասնավորապես, ծրագրի իրականացման կառուցվածքային շրջանակների ամրապնդման, կայուն թիմի ստեղծման անհրաժեշտությունը, ինչը, ըստ նրա, կնպաստի նաև բարեփոխումներն ավելի հրապարակային դարձնելուն։
Վարչապետ Տիգրան Սարգսյանը շնորհակալություն է հայտնել պատվիրակությանը` նշված ոլորտներում մեր երկրում իրականացվող բարեփոխումներին աջակցություն ցույց տալու տևական և արդյունավետ ջանքերի համար։ Նա նշել է, որ աշխատանքները կշարունակվեն` արված առաջարկությունները հաշվի առնելով։
Ստեֆկա Սլավովան ևս ընդգծել է, որ պատվիրակությունը պատրաստ է նույն արդյունավետությամբ աշխատել, որն, ըստ նրա, անպայման կտա իր արդյունքը և օրենսդրական ու այլ բարեփոխումների ժամանակին իրականացման դեպքում, մինչև մայիսի վերջերին նախատեսվող կորպորացիայի նոր պատվիրակության ժամանումը, ծրագրի ցուցանիշները որոշակիորեն կբարելավվեն։
