ուրբաթ, 10 ապրիլի 2009
ՀՀ վարչապետ Տիգրան Սարգսյանն այսօր մասնակցել է Կարեն Դեմիրճյանի անվան մարզահամերգային համալիրում «Պրոմ էքսպո» ընկերության կողմից, նաև ՀՀ կառավարության աջակցությամբ կազմակերպված «Շինարարություն և ինտերիեր 2009» մասնագիտացված ազգային ցուցահանդեսի բացմանը։
Ողջունելով միջոցառման մասնակիցներին, վարչապետը նշել է, որ կառավարությունն աջակցում է ավանդաբար կազմակերպվող այս ցուցահանդեսին` նպատակ ունենալով խթանել շինարարության ոլորտում գործող ընկերությունների միջև փորձի, ժամանակակից տեխնոլոգիաների կիրառման վերաբերյալ տեղեկատվության փոխանակումը, պարզելու համար, թե որո՞նք են այն նորամուծությունները, որ հնարավոր է ապահովել այս բնագավառում։
«Գաղտնիք չէ, որ շինարարությունը Հայաստանի տնտեսության շարժիչներից մեկն է և այսօր այդ ոլորտում մասնավոր ներդրումների նվազումը էական ազդեցություն է թողնում ընդհանուր տնտեսական համակարգի և համախառն ներքին արդյունքի ցուցանիշի վրա։ Նաև ուզում եմ օգտվել այս հնարավորությունից ու ևս մեկ անգամ ձեր ուշադրությունը հրավիրել այն նոր նախաձեռնության վրա, որով հանդես եկավ օպերատիվ շտաբը երեկ, այն է` կառավարությունը` նպատակ ունենալով խրախուսել և աջակցել շինարարության ոլորտի զարգացումը, բացառիկ որոշում է ընդունել` տրամադրել պետական երաշխիքներ կառուցապատողներին, որպեսզի նրանք կարողանան մեծ ծավալով վարկեր ներգրավել առևտրային բանկերից և շինարարությունը նոր թափ ստանա։ Համոզված եմ, որ այսօրվա ցուցահանդեսը նույնպես այդպիսի բացառիկ հնարավորություն է, որով մենք փորձում ենք խթանել ընդհանրապես շինարարության ոլորտի զարգացումը ՀՀ-ում», - ասել է վարչապետը։
Բացման արարողությունից հետո, վարչապետ Տիգրան Սարգսյանը շրջել է ցուցահանդեսի տաղավարներում, ծանոթացել ոլորտի մի քանի տասնյակ ընկերությունների արտադրանքի նմուշներին։
