Հայաստանի Հանրապետության Կառավարություն

ՀՀ վարչապետ Տիգրան Սարգսյանն այսօր ընդունել է Հայկական բարեգործական ընդհանուր միության (ՀԲԸՄ) նախագահ Պերճ Սեդրակյանին։
Վարչապետը նշել է, որ պարոն Սեդրակյանի հետ նախորդ հանդիպման ժամանակ ձեռք բերված պայմանավորվածությունների իրականացման արդյունքները ոգևորիչ են։ ՀՀ կառավարության ղեկավարը շնորհակալություն է հայտնել Հայ բարեգործական ընդհանուր միությանը և անձամբ Պերճ Սեդրակյանին Հայրենիքում իրականացված ծրագրերի համար։ Ըստ Տիգրան Սարգսյանի, այդ ամենն այսօր կարևորվում է նաև այն պատճառով, որ օգնում է թուլացնելու համաշխարհային ֆինանսական և տնտեսական ճգնաժամի բացասական ազդեցությունները, միաժամանակ, նաև բարձրացնելու դիմադրողականությունը դրանց հանդեպ։
ՀԲԸՄ-ի նախագահ Պերճ Սեդրակյանն ընդգծել է, որ, իր համոզմամբ, միության գործունեությունը պետք է կենտրոնանա առաջին հերթին հայրենիքի շուրջ, քանի որ ըստ նրա, իրականացվող ծրագրերը Հայրենիքի միջոցով աջակցում են նաև ամբողջ սփյուռքի հիմնախնդիրների լուծմանը։
Զրույցի ընթացքում Տիգրան Սարգսյանը և Պերճ Սեդրակյանը խոսել են նաև Սփյուռքի ներուժի պահպանման, ազգային նպատակների շուրջ սփյուռքահայության համախմբման, հայապահպանության, կրթական և այլ հիմնախնդիրների լուծման համար հայոց պետության, եկեղեցու, բարեգործական և այլ կազմակերպությունների ջանքերի մեկտեղման հարցերի մասին։