Հայաստանի Հանրապետության Կառավարություն

ՀՀ վարչապետ Տիգրան Սարգսյանն այսօր ընդունել է ՀՀ-ում Վրաստանի արտակարգ և լիազոր դեսպան Ռևազ Գաչեչիլաձեին, ով ավարտում է իր դիվանագիտական առաքելությունը մեր երկրում։
Վարչապետը շնորհակալություն է հայտնել դեսպանին անցած չորս տարիների ընթացքում երկու երկրների միջև բարիդրացիական, բարեկամական հարաբերությունների, տարբեր ոլորտներում համագործակցության ամրապնդմանն ուղղված ակտիվ գործունեության համար։
Ռևազ Գաչեչիլաձեն նշել է, որ իր դիվանագիտական գործունեության շրջանում առիթ է ունեցել ուշի ուշով հետևելու վերջին տարիներին Հայաստանում տեղի ունեցող գործընթացներին, այդ տեսանկյունից դիտելու նաև Վրաստանում ընթացող զարգացումները, ինչը, ըստ նրա, օգնել է իրեն որոշակի փորձ կուտակելու ինչպես երկու երկրների միջև համագործակցության ամրապնդման, այնպես էլ տարածաշրջանային հիմնախնդիրների կարգավորման հարցերի շուրջ։ «Իմ դիվանագիտական առաքելության ժամկետն ավարտվելու կապակցությամբ, Հայաստանից մեկնում եմ հարգանքով՝ այս երկրի, և սիրով՝ հայ ժողովրդի նկատմամբ», - ասել է Ռևազ Գաչեչիլաձեն։
Վարչապետ Տիգրան Սարգսյանը հաջողություն է մաղթել դեսպանին՝ նրա հետագա գործունեության մեջ և անձնական կյանքում։