Հայաստանի Հանրապետության Կառավարություն

ՀՀ վարչապետ Տիգրան Սարգսյանն այսօր ընդունել է Արժույթի միջազգային հիմնադրամի պատվիրակությանը, որի կազմում են Հայաստանում ԱՄՀ մշտական ներկայացուցիչ Նինկե Օմեսը, ԱՄՀ Միջին Արևելքի և Կենտրոնական Ասիայի վարչության փոխտնօրեն Լորենսո Պերեսը, ԱՄՀ գործադիր տնօրեն Ահ Բաքքերը, ԱՄՀ հայաստանյան առաքելության ղեկավար Մարկ Լուիսը և առաքելության մի շարք տնտեսագետներ։
ԱՄՀ առաքելության այցը, ըստ պատվիրակության ներկայացուցիչների, համաշխարհային ֆինանսական և տնտեսական ճգնաժամի պայմաններում նպատակ ունի` առկա իրավիճակում և նաև Հայաստանի առաջիկա տարիների հեռանկարի ֆոնին, ՀՀ կառավարության հետ քննարկելու հետագա համագործակցության հարցերը, որոնք ամփոփված են «Տնտեսական և ֆինանսական քաղաքականությունների հուշագրի» նախագծում։
ՀՀ կառավարության ղեկավարը և ԱՄՀ ներկայացուցիչներն անդրադարձել են Հուշագրում ներկայացված` հիմնադրամի գնահատականներին, եզրակացություններին և առաջարկություններին, մոտեցումների առումով ընդհանուր համաձայնություն ունենալով` քննարկել առաջարկությունների մանրամասները։