չորեքշաբթի, 5 փետրվարի 2003
Այսօր ՀՀ վարչապետ Անդրանիկ Մարգարյանն ընդունել է ՌԴ արդյունաբերության, գիտության և տեխնոլոգիաների նախարար, հայ-ռուսական տնտեսական համագործակցության միջկառավարական հանձնաժողովի համանախագահ Իլյա Կլեբանովին և նրա գլխավորած պատվիրակությանը։ Հանդիպմանը ներկա են եղել հանձնաժողովի հայկական կողմի համանախագահ Սերժ Սարգսյանը, միջկառավարական հանձնաժողովի անդամներ։ Համանախագահները ՀՀ վարչապետին ներկայացրել են հանձնաժողովի նիստի արդյունքները, ձեռք բերված համաձայնությունները, որոնք տեղ են գտել ստորագրված փաստաթղթերում։
ՀՀ վարչապետ Անդրանիկ Մարգարյանն արդիական և շատ կարևոր է համարել նիստի արձանագրության մեջ ներառված հարցերը, որոնց շուրջ ձեռք բերված փոխհամաձայնությանը, ըստ նրա, պետք է կարճ ժամանակ հետո հաջորդի դրանց իրագործման ծրագրի մշակումը համապատասխան մեխանիզմների ամրագրմամբ։
Իլյա Կլեբանովը ՀՀ վարչապետին տեղեկացրել է, որ առաջիկայում այդ հարցերը կքննարկվեն առանձին աշխատանքային հանդիպումներում, որոնց վերաբերյալ արդեն պայմանավորվածություններ կան հանձնաժողովի հայկական կողմի համանախագահի հետ։ Պարոն Կլեբանովը նշել է նաև, որ այս տարվա մայիսին նախատեսում են Երևանում անցկացնել Հայաստան-Ռուսաստան ներդրումային մեծ համաժողով, որը լրացուցիչ խթան կհանդիսանա հայ-ռուսական տնտեսական համագործակցության զարգացման գործում։
Հանդիպման ընթացքում անդրադարձ է եղել միջկառավարական հանձնաժողովի նիստում քննարկված վառելիքաէներգետիկ համալիրի խնդիրներին, ՀՀ-ի և ՌԴ-ի միջև տրանսպորտային հաղորդակցության ուղիների լիարժեք օգտագործման նպատակով գործադրվելիք ջանքերին, Ծաղկաձորի սպորտային համալիրը համաշխարհային մակարդակի համալիր դարձնելու ռուսական կողմի ծրագրերին։
