չորեքշաբթի, 21 հունվարի 2009
ՀՀ վարչապետ Տիգրան Սարգսյանի մոտ այսօր շարունակվել են տարբեր ոլորտներում կառավարության արդյունաբերական քաղաքականության հստակեցման և այդ ոլորտների զարգացման հեռանկարի ուղղությամբ քննարկումները, որի շրջանակներում տեղի է ունեցել նաև քիմիական արդյունաբերության խնդիրների վերաբերյալ խորհրդակցություն։ Քննարկմանը մասնակցել են ոլորտի ձեռնարկությունների, շահագրգիռ նախարարությունների ու գերատեսչությունների ներկայացուցիչներ։
Վարչապետի հավաստմամբ, բացի վերոնշյալից, քննարկումները նպատակ ունեն նաև ճշտելու համաշխարհային ֆինանսական և տնտեսական ճգնաժամով պայմանավորված դժվարությունները հաղթահարելու գործում պետության աջակցության հնարավորությունները` դրանք քննարկելով մասնավոր հատվածի ներկայացուցիչների հետ։
Քիմիական արդյունաբերության ներկայիս հիմնախնդիրների և զարգացման հեռանկարի վերաբերյալ ՀՀ էներգետիկայի և բնական պաշարների նախարարին ու հրավիրված ընկերությունների ներկայացուցիչներին լսելուց հետո, Տիգրան Սարգսյանն առաջարկել է գործարար համայնքի ներկայացուցիչներին` կառավարությունում ձևավորված օպերատիվ շտաբ ներկայացնել զարգացման իրենց ծրագրերը, նշելով, թե նկարագրված թիրախներին հասնելու համար հատկապես ինչպիսի՞ աջակցություն են ակնկալում պետությունից` օրենսդրական, սերտիֆիկացման խնդիրների լուծման, վարկավորման, թե՞ այլ։ Նա ընդգծել է, թե արտահանման կարողություններ, երաշխավորված շուկաներ ունեցող և սպառման պահանջարկ վայելող ընկերություններին աջակցելու հարցում պետությունը շահագրգիռ է ու փորձելու է հնարավորությունների սահմաններում օժանդակել այդ ընկերությունների զարգացմանը։ Վարչապետը հանձնարարել է ՀՀ էկոնոմիկայի նախարարին` արդյունաբերական ճյուղերի վերաբերյալ անցկացվող քննարկումներն ամփոփել և դրանց արդյունքներից ելնելով, յուրաքանչյուր ճյուղի վերաբերյալ ներկայացնել հայեցակարգ։
