երկուշաբթի, 19 հունվարի 2009
ՀՀ վարչապետ Տիգրան Սարգսյանը հունվարի 17-18-ին երկօրյա աշխատանքային այցով եղել է Լեռնային Ղարաբաղի Հանրապետությունում։ ՀՀ վարչապետին ուղեկցել են ՀՀ պաշտպանության, տրանսպորտի և կապի նախարարները։ Այցի նպատակն էր` ՀՀ-ի և ԼՂՀ-ի կառավարությունների ընդլայնված կազմով նիստում անցյալ տարի ձեռք բերված պայմանավորվածությունների շրջանակում 2009 թվականի համագործակցության ծրագրերի համակարգման և իրականացվելիք աշխատանքների առաջնահերթությունների քննարկումը, ինչպես նաև տեղում Արցախի իշխանությունների հետ` ենթակառուցվածքների, զգալի ներուժ ունեցող գյուղատնտեսության ու այլ ոլորտներում համայնքների խնդիրներին ծանոթանալը, դրանց լուծմանը Հայաստանի Հանրապետության հնարավոր օժանդակության հարցերի քննարկումը։
ՀՀ կառավարության ղեկավարը եղել է ԼՂՀ մայրաքաղաք Ստեփանակերտում և Շահումյանի շրջանում, այդ թվում` շրջկենտրոն Քարվաճառում, զրուցել բնակչության հետ, ծանոթացել նրանց հուզող խնդիրներին։ ԼՂՀ նախագահ Բակո Սահակյանի և վարչապետ Արա Հարությունյանի հետ Տիգրան Սարգսյանն այցելել է նաև Դրմբոնի «Բեյզ Մեթըլս» ընկերություն, հետաքրքրվել ընկերության աշխատանքի ընթացիկ վիճակով, 2009թ. ծրագրերով։
Ստեփանակերտում ՀՀ կառավարության ղեկավարը ԼՂՀ ղեկավարության հետ այցելել է պաշտպանության բանակի զորամասեր, ծանոթացել զինվորների առօրյային, զրուցել նրանց հետ, սպայական անձնակազմի հետ հանդիպումներ ունեցել պաշտպանության բանակի շտաբում։ ԼՂՀ պաշտպանության նախարարը ներկայացրել է բանակաշինության խնդիրներն ու զարգացման ծրագրերը։
ՀՀ վարչապետը, լրագրողների հետ հարցազրույցում, համոզվածություն է հայտնել, որ դժվարությունները համատեղ ուժերով շատ ավելի հեշտ է լուծել։
