հինգշաբթի, 9 հունվարի 2003
Այսօր տեղի ունեցավ ՀՀ կառավարության նիստ, որը վարեց ՀՀ նախագահ Ռոբերտ Քոչարյանը:
Կառավարությունը հավանություն տվեց բազմաբնակարան շենքի կառավարման աջակցության ծրագրի հիմնադրույթներին: Ծրագիրը երկարաժամկետ է և նախատեսում է աջակցության միջոցով իրականացվելիք այն միջոցառումները, որոնք նպատակաուղղված կլինեն բազմաբնակարան շենքի պահպանման պարտադիր նորմերի կատարման ապահովմանը, ինչպես նաև շենքի կառավարման մարմինների կայացմանն ու բնագավառի զարգացման անհրաժեշտ պայմանների ստեղծմանը:
Ջրային օրենսգրքի համաձայն, հաստատվեց պետական սեփականություն հանդիսացող ջրային համակարգը հավատարմագրային կառավարման հանձնելու կարգը: Հանձնարարվեց կառավարությանն առընթեր ջրային տնտեսության պետական կոմիտեի նախագահին՝ պետական գույքի կառավարման նախարարի հետ, քառամսյա ժամկետում, կառավարություն ներկայացնել հավատարմագրային կառավարման հանձնելու ենթակա պետական սեփականություն հանդիսացող ջրային համակարգերի ցանկը՝ ըստ առաջնահերթության:
Ելնելով հանրապետության նպաստառու ընտանիքների շահերից, գործադիրը փոփոխություն կատարեց կառավարության 2000 թ. հուլիսի 3-ի «Աղքատության ընտանեկան նպաստի և միանվագ դրամական օգնության նշանակման և վճարման կարգի մասին» որոշման մեջ։ Սահմանվեց, որ այսուհետ կենսաթոշակառուների թոշակների բարձրացված չափերը հաշվի կառնվեն ոչ թե բարձրացման պահից և ամբողջությամբ, որի հետևանքով որոշ թվով ընտանիքներ դուրս են մնում նպաստառուի կարգավիճակից, այլ նախորդած 12 ամիսների միջին ամսական եկամուտի չափով։ Որոշմամբ բարձրացվեց նաև յուրաքանչյուր նպաստառու ընտանիքի մինչև 18 տարեկան անդամին տրվող միանվագ դրամական օգնության չափը 2003թ. հուլիսի 1-ից 1500 դրամի փոխարեն դառնալով 2000 դրամ։
Նիստում հաստատվեց հեռահաղորդակցության բնագավառում լիցենզավորման ենթակա գործունեության տեսակների վերաբերյալ «Լիցենզավորման մասին» ՀՀ օրենքով նախատեսված փորձաքննությունների իրականացման կարգը: Դրանով սահմանվում են նաև փորձաքննության իրականացման ընթացակարգին ներկայացվող հիմնական պահանջները, կարգավորվում են այդ ընթացակարգում մասնակցող սուբյեկտների փոխհարաբերությունները:
Մեկ այլ որոշմամբ հաստատվեցին չվացուցակի ենթակա և չվացուցակի չենթարկվող օդային տրանսպորտի գործունեության լիցենզավորման կարգը և նշված գործունեության իրականացման լիցենզիայի ձևը։
Նիստում հաստատվեցին «Ոստիկանության ծառայողի առողջական վիճակի հետազոտման պայմանները, պարբերականությունը և կարգը, ոստիկանության ուսումնական հաստատության մասնագիտական առարկաների ցանկը:
«Փախստականների մասին» ՀՀ օրենքին համապատասխան, կառավարությունը որոշեց հաստատել Հայաստանի Հանրապետությունում օտարերկրյա քաղաքացիներին կամ քաղաքացիություն չունեցող անձանց ժամանակավոր ապաստան տալու կարգը: Գործադիրը հաստատեց նաև ժամանակավոր ապաստանի վկայականի տրման կարգը և նկարագիրը: Մեկ այլ որոշմամբ, Հայաստանի Հանրապետությունում ժամանակավոր ապաստանի հարցերով զբաղվող լիազորված մարմին ճանաչվեց ՀՀ կառավարությանն առընթեր միգրացիայի և փախստականների վարչությունը:
Կառավարությունը հաստատեց ՀՀ Գեղարքունիքի մարզի պատմության և մշակույթի անշարժ հուշարձանների պետական ցուցակը՝ համաձայն հավելվածի: Այդ կապակցությամբ որոշվեց ուժը կորցրած ճանաչել Հայկական ՍՍՀ Մինիստրների խորհրդի 1983թ. հուլիսի 4-ի համապատասխան որոշման առաջին կետը՝ նախկին Կամոյի, Կրասնոսելսկի, Մարտունու, Սևանի, Վարդենիսի շրջանների պատմության և մշակույթի հուշարձանների ցուցակի մասով:
Կառավարության անդամները համաձայնություն տվեցին «Հայաստանի Հանրապետության կառավարության և Գերմանիայի Դաշնային Հանրապետության կառավարության միջև «Հայաստանում աղքատության նվազեցման ռազմավարական փաստաթղթի մշակում և ներդրում» ծրագրի վերաբերյալ համաձայնագրի, ինչպես նաև ՀՀ կառավարության և ժողովրդավարության և ընտրությունների աջակցության միջազգային ինստիտուտի միջև «Երևանում ժողովրդավարության և ընտրությունների աջակցության միջազգային ինստիտուտի գրասենյակի կարգավիճակի մասին» համաձայնագրի կնքման առաջարկություններին:
Մեկ այլ որոշմամբ գործադիրը հաստատեց «Հայաստանի Հանրապետության բնապահպանության նախարարության և Ռուսաստանի Դաշնության միջև ընդերքի և ջրային ռեսուրսների օգտագործման ոլորտներում համագործակցության մասին» միջգերատեսչական համաձայնագիրը:
