երկուշաբթի, 8 դեկտեմբերի 2008
ՀՀ վարչապետ Տիգրան Սարգսյանն այսօր ընդունել է Համաշխարհային բանկի հայաստանյան գրասենյակի տնօրեն Արիստոմենե Վարուդակիսին և Օտարերկրյա ներդրումների խորհրդատվական ծառայության (FIAS) ղեկավար Կարին Միլեթին, ՀԲ-ի ու հիշյալ ծառայության մասնագետների:
Հանդիպման ժամանակ Օտարերկրյա ներդրումների խորհրդատվական ծառայության ներկայացուցիչները ՀՀ վարչապետին և հանդիպմանը մասնակցող ՀՀ էկոնոմիկայի և ֆինանսների նախարարներին ու Զարգացման հայկական գործակալության տնօրենին ներկայացրել են ՀԲ-ի առաջարկությամբ իրենց իրականացրած ուսումնասիրությունների և գնահատման վերաբերյալ վերջնական զեկույցը, որը վերաբերում է Զարգացման հայկական գործակալության գործունեությանը և ինստիտուցիոնալ առումով աշխատանքի արդյունավետության բարձրացմանը, զարգացման հետագա քայլերին: Համաշխարհային բանկը, որը հոլանդական դրամաշնորհի միջոցով ԶՀԳ-ի հետ նոր` 2 մլն ԱՄՆ դոլար արժողությամբ տեխնիկական աջակցության ծրագիր է սկսում, դրա մեկնարկից առաջ պատվիրելով նման աշխատանք, կարևորել է գործակալության գործունեության արդյունավետության բարձրացմանն ուղղված մասնագիտական խորհրդատվությունը:
ՀՀ վարչապետը, Օտարերկրյա ներդրումների խորհրդատվական ծառայության մասնագետների գնահատականները, եզրակացություններն ու առաջարկությունները լսելուց հետո, նշել է, թե դրանք ևս մեկ անգամ հաստատեցին ԶՀԳ-ում բարեփոխումներ իրականացնելու իր` որպես գործակալության խորհրդի նախագահի, մոտեցումները: ՀՀ կառավարության ղեկավարը շնորհակալություն է հայտնել օգտակար աշխատանքի համար` ԶՀԳ-ի հետագա գործունեության բարելավման տեսանկյունից կարևորելով ոսումնասիրության արդյունքում տրված գնահատականները և խորհրդատվությունը:
