երեքշաբթի, 21 հոկտեմբերի 2008
ՀՀ վարչապետ Տիգրան Սարգսյանի շնորհավորական խոսքը Ջանիկ Ջանոյանի ծննդյան 80-ամյակի կապակցությամբ
Հարգելի Ջանիկ Ջանոյան
Սրտանց շնորհավորում եմ Ձեզ` ծննդյան 80-ամյակի կապակցությամբ:
Ձեր ապրած երկարատև անբասիր կյանքն ու գործունեությունը անխզելիորեն կապված են վերջին մի քանի տասնամյակի մեր երկրի ու ժողովրդի կենսագրությանը, որը լի է թե՛ ակնառու հաջողություններով և թե՛ բազում դժվարություններով:
Երկար տարիներ պատասխանատու պաշտոններ զբաղեցնելով Խորհրդային Հայաստանի կառավարության կազմում, ավելի քան մեկուկես տասնամյակ ղեկավարելով երկրի ֆինանսական համակարգը, Դուք ձեռք եք բերել մեծ փորձ ու հմտություններ, կազմակերպչական ունակություններ, որոնք այնուհետ անկախության առաջին իսկ տարիներից ի սպաս եք դրել Հայաստանի Հանրապետության կայացման, երկրի ֆինանսների կառավարման, տնտեսության վերականգնման ազգաշահ գործին:
Երախտապարտ սերունդներն այսուհետ Ձեզ հիշելու են ոչ միայն որպես Հայաստանի երկրորդ Հանրապետության վերջին, այլև երրորդ Հանրապետության առաջին ֆինանսների նախարար, ում բախտ է վիճակվել իր ստորագրությունը դնելու նորանկախ Հայաստանի առաջին թղթադրամի նմուշի վրա:
Այսօր էլ Դուք շարունակում եք Ձեր բեղմնավոր ու արդյունավետ գործունեությունը Զարգացման հայկական բանկի տնօրենների խորհրդի նախագահի պաշտոնում` անընդմեջ վերընտրվելով արդեն 14-րդ անգամ:
Կրկին շնորհավորելով ծննդյան 80-ամյակի կապակցությամբ, մաղթում եմ Ձեզ առողջություն և անսպառ եռանդ, երջանկություն և ստեղծագործական աշխատանքի նորանոր տարիներ` ի նպաստ մեր երկրի ու ժողովրդի հետագա բարգավաճման:
