ուրբաթ, 22 նոյեմբերի 2002
Այսօր ՀՀ վարչապետ Անդրանիկ Մարգարյանն ընդունել է ՌԴ մշակույթի նախարար Միխայիլ Շվիդկոյին։ Նշելով վերջին շրջանում Հայաստանի և Ռուսաստանի միջև քաղաքական և տնտեսական հարաբերությունների ակտիվացումը, կողմերը կարևորել են նաև պատմական խոր արմատներ ունեցող հայ-ռուսական մշակութային կապերի զարգացումը շուկայական հարաբերությունների նոր պայմաններում։ Պարոն Մ.Շվիդկոյը վարչապետին է ներկայացրել ՀՀ մշակույթի, երիտասարդության հարցերի և սպորտի նախարարության հետ մշակված համագործակցության ծրագիրը։ Առաջիկա երեք տարիների համար նախատեսված այդ ծրագիրն ընդգրկում է մշակութային տարբեր խմբերի փոխայցելությունների, հյուրախաղերի, հրատարակիչների ու թարգմանիչների հանդիպումների, Մոսկվայում հայ և ռուս մտավորականության համաժողովի կազմակերպում, երկու պետությունների գրադարանային ֆոնդերի հարստացում, ՌԴ բուհերում գեղագիտական կրթություն ստանալու հնարավորությունների խթանում։ Նշվել է, մասնավորապես, համատեղ կինոարտադրության կազմակերպման կարևորությունը, որի վերաբերյալ ՀՀ և ՌԴ միջկառավարական Համաձայնագրի ստորագրմանն արդեն իսկ հավանություն է տվել ՌԴ կառավարությունը։
Նշելով, որ, ինչպես հայ և ռուս մշակույթների, այնպես էլ Հայաստանի և Ռուսաստանի մշակութային գործիչների միջև հարաբերությունները միշտ էլ եղել են ջերմ ու բարեկամական, վարչապետ Անդրանիկ Մարգարյանը հավաստիացրել է, որ ՀՀ կառավարությունը պատրաստ է հնարավորինս աջակցելու երկուստեք մշակութային ծրագրերի իրականացմանը, հայ և ռուս մշակութային կապերի հետագա զարգացմանը։
