երեքշաբթի, 14 հոկտեմբերի 2008
Այսօր ՀՀ վարչապետ Տիգրան Սարգսյանը հանդիպեց Ամերիկայի Հայկական ազգային կոմիտեի ղեկավարների հետ: Հանդիպման ընթացքում քննարկվեց Կոմիտեի գործունեությունը, ինչպես նաև Հայաստանի Հանրապետության ու հայկական լոբբիի գործակցության ներկան ու հեռանկարները:
Այնուհետև, ՀՀ վարչապետը հանդիպեց ԱՄՆ առևտրի քարտուղար Կարլոս Գուտյերեսի հետ: Կողմերը շոշափեցին երկկողմ համագործակցության օրակարգի այնպիսի թեմաներ, ինչպիսիք են, մասնավորապես, միջպետական առևտրային համաձայնագրերի կնքումը, Հայաստանում բարձր տեղեկատվական տեխնոլոգիաների զարգացման համար բարենպաստ պայմանների ստեղծումը, փոքր և միջին բիզնեսի զարգացման համար տեխնիկական օժանդակության ցուցաբերումը և ազատ տնտեսական գոտու ձևավորումը:
Վարչապետի ամփոփիչ հանդիպումը ԱՄՆ պետքարտուղար Կոնդոլիզա Ռայսի հետ էր: Հիշեցնենք, որ մինչ այդ գործադիր իշխանության ղեկավարն աշխատանքային այցի շրջանակներում հանդիպել էր ԱՄՆ փոխնախագահ Դիք Չեյնիին, ինչպես նաև Համաշխարհային բանկի և Արժույթի միջազգային հիմնադրամի ներկայացուցիչներին:
Կողմերը կարծիք հայտնեցին առ այն, որ ղարաբաղյան հիմնախնդրի լուծման գործընթացն անհրաժեշտ է շարունակել ԵԱՀԿ Մինսկի խմբի շրջանակներում տարվող բանակցությունների ձևաչափով, և, ըստ տիկին Ռայսի, գործընթացը ԵԱՀԿ Մինսկի խմբի շրջանակներից դուրս տեղափոխելու փորձերն ուշադրության կարիք չունեն: Վարչապետն ընդգծեց, որ Հայաստանը պատրաստ է շարունակել բանակցային գործընթացը և վտանգավոր որակեց այնպիսի հայտարարությունները, որոնք, միակողմանիորեն նշելով միայն տարածքային ամբողջականության սկզբունքը, անտեսում են միջազգային իրավունքի հավասարազոր և հանրաճանաչ այլ սկզբունքները:
Տիկին Ռայսն անդրադարձավ նաև հայ-թուրքական հարաբերությունների թեմային՝ հետաքրքրվելով Թուրքիայի նախագահի այցից հետո ստեղծված իրավիճակով: Վարչապետը նշեց, որ Հայաստանը դիվանագիտական հարաբերությունների հաստատման համար նախապայմաններ չի առաջադրում Թուրքիայի Հանրապետությանը և հուսով է, որ Թուրքիան կհետևի այս օրինակին:
Պետքարտուղարը Վարչապետին փոխանցեց իր պատրաստակամությունը՝ հնարավորինս սատարելու երկկողմ համագործակցության տարբեր ոլորտներում ԱՄՆ-ի կողմից Հայաստանի Հանրապետությանը ցուցաբերվող տեխնիկական օժանդակության միջոցառումների իրականացմանը:
