կիրակի, 12 հոկտեմբերի 2008
Այսօր ՀՀ վարչապետ Տիգրան Սարգսյանը հանդիպեց Արժույթի միջազգային հիմնադրամի գործադիր տնօրեն Դոմինիկ Ստրաուս-Քանի հետ: Հայաստանի գործադիր իշխանության ղեկավարը ԱՄՀ բարձրաստիճան պաշտոնյայի հետ քննարկեց համաշխարհային տնտեսական ճգնաժամի հիմնախնդիրը, նաև նավթի գների անկման միտումները և այս գործըթացների հնարավոր ազդեցությունը հայաստանյան տնտեսության վրա: Կողմերը շոշափեցին Երևանում ԱՄՀ ներկայացուցչի գրասենյակ հիմնելու հեռանկարը: Վերջինս, ըստ կողմերի միջև ձեռք բերված նախնական պայմանավորվածության, կօժանդակի Հայաստանում իրականացվող բարեփոխումներին: Ավելի վաղ նման առաքելությամբ ՀՀ է ժամանել նաև Համաշխարհային բանկի ներկայացուցիչը և Երևանը ՀԲ պատվիրակի հետ համատեղ աշխատանքը գնահատում է դրական և արդյունավետ: Կողմերը համաձայնեցին հարցին անդրադառնալ նաև նոյեմբերին, երբ Երևան կժամանի ԱՄՀ պատվիրակութունը:
ՀՀ վարչապետը անդրադարձավ նաև հայ-թուրքական հարաբերությունների թեմային՝ ընդգծելով, որ Հայաստանը չի առաջադրում նախապայմաններ Թուրքիայի Հանրապետությանը դիվանագիտական հարաբերությունների հաստատման համար, իսկ Անկարան հանդես է գալիս մի շարք նախապայմաններով:
Ավելի ուշ ՀՀ վարչապետը հանդիպեց Վրաստանի վարչապետ Լադո Գուրգենիձեի: Կողմերը հիմնականում անդրադարձան հայ-վրացական միջկառավարական հանձնաժողովի առաջիկա նիստի նախապատրաստական աշխատանքներին, որ սպասվում է հոկտեմբերի 27-28-ին Թբիլիսիում: Գործընկերները շոշափեցին նաև տարածաշրջանային վերջին զարգացումների թեման:
