շաբաթ, 11 հոկտեմբերի 2008
Հոկտեմբերի 11-ին ՀՀ վարչապետ Տիգրան Սարգսյանը հանդիպել է Համաշխարհային բանկի հոլլանդական խմբի գործադիր տնօրեն Հերման Վայֆելսին: Ի դեպ, վերջինիս այս պաշտոնում փոխարինելու է Ռուդ Տրեֆերսը, ով նույնպես ներկա էր հանդիպմանը: Քննարկումների առանցքում էին համաշխարհային ֆինանսատնտեսական ճգնաժամը, վերջինիս հասունացումը Ռուսաստանում և հնարավոր անդրադարձը Հայաստանի տնտեսության վրա: Կողմերը քննարկեցին նաև վրաց-օսական ռազմական գործողություններից հետո հայաստանյան տնտեսությանը հասցված վնասի չափերը: Հերման Վայֆելսը փաստեց, որ չնայած աշխարհում հասունացող ճգնաժամին և դրա բացասական հետևանքներին՝ Համաշխարհային բանկի Եվրոպայի և Կենտրոնական Ասիայի տարածաշրջանային խմբում ընդգրկված Հայաստանն ակնհայտ քիչ վնասներ կկրի և ըստ ՀԲ ու Արժույթի Միջազգային Հիմնադրամի կանխատեսումների, տնտեսական աճի ամենամեծ ցուցանիշն է ունենալու 2009թ-ի կտրվածքով՝ նշված խմբի մյուս երկրների համեմատ: Տիգրան Սարգսյանը հետաքրքրվեց Համաշխարհային բանկի դերով և առաջարկություններով այն երկրներին, որոնք աշխարհում ֆինանսական ճգնաժամի հետևանքների արդյունքում անխուսափելիորեն կարող են խնդիրներ ունենալ: Հերման Վայֆելսը նշեց, որ ՀԲ մուտք կգործի այն տարածքներ, որտեղ մասնավոր հատվածը նահանջելու միտումներ կդրսևորի:
Վրաստանի դեպքերին անդրադառնալով՝ ՀՀ վարչապետն ընդգծեց, որ կտրականապես դեմ է Վրաստանում իրավիճակի միակողմանի վերլուծությունների, քանի որ պատկերը խեղաթյուրված է լինում, երբ հաշվի չեն առնվում տարածաշրջանի բոլոր երկրների շահերը: Նա վերահաստատեց, որ Հայաստանը պատրաստ է մասնակցություն ունենալ ցանկացած տարածաշրջանային ծրագրի:
