երեքշաբթի, 23 սեպտեմբերի 2008
ՀՀ վարչապետ Տիգրան Սարգսյանն այսօր ընդունել է Գերմանիայի Դաշնային Հանրապետության Սահմանադրական դատարանի նախագահ Հանս-Յուրգեն Պապիերին և նրա գլխավորած պատվիրակությանը: Տիգրան Սարգսյանը կարևորել և Հայաստանի համար հետաքրքրական ու օգտակար է համարել շուրջ 6 տասնամյակի փորձ և ավանդույթներ ունեցող Գերմանիայի Սահմանադրական դատարանի հետ մեր երկրի Սահմանադրական դատարանի համագործակցությունը. «Հայաստանի Սահմանադրական դատարանն ավելի երիտասարդ է, սակայն բավականին լուրջ փորձությունների միջով է անցել»,- ասել է վարչապետը, հյուրերին համառոտ ներկայացնելով Հայաստանի անկախացումից հետո, պետականության կայացման, այդ թվում` իշխանությունների ձևավորման անցած ճանապարհը, Սահմանադրական դատարանի հիմնադրման և մեր պետության կյանքում այդ կարևորագույն ինստիտուտի դերն ու նշանակությունը. «Եթե անկախ պետության կայացման առաջին տարիներին կարևոր էր օրենսդրական անհրաժեշտ հիմքերի ստեղծումը, ապա այսօր արդեն կարևոր է դարձել ընդունված օրենքների ու սահմանադրական նորմերի պահպանումը»,- ընդգծել է Տիգրան Սարգսյանը: Վարչապետը նաև նշել է, որ Հայաստանում հետաքրքրված են պաշտոնատար անձանց շահերի բացահայտման ինստիտուտի և էթիկայի կանոնների ներդրման ու պահպանման հարցերում գերմանական փորձով:
ԳԴՀ ՍԴ նախագահ Հանս-Յուրգեն Պապիերը պատրաստակամություն է հայտնել իր երկրի Սահմանադրական դատարանի կուտակած տարիների փորձը փոխանցել Հայաստանի Հանրապետությանը:
Հանդիպման ավարտին, վարչապետ Տիգրան Սարգսյանը շնորհակալություն է հայտնել ԳԴՀ ՍԴ նախագահին` համագործակցության պատրաստակամության համար, հույս հայտնելով, որ նրա այցը օգտակար ու արդյունավետ կլինի: Տիգրան Սարգսյանը, պատեհ առիթից օգտվելով, նաև անդրադարձել է Հայաստանի և Գերմանիայի կառավարությունների միջև առկա համագործակցությանը` բարձր գնահատելով անցած տարիներին մեր երկրին տարբեր բնագավառներում Գերմանիայի կառավարության ցուցաբերած տեխնիկական օժանդակությունը:
