ուրբաթ, 15 օգոստոսի 2008
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Սիմոն Տեր-Սիմոնյանը:
Հանձնաժողովը քննարկել է 7 բարեգործական ծրագիր: Մասնավորապես, քննարկվել և հաստատվել են «Հայաստան» համահայկական հիմնադրամի կողմից իրականացվող` «Լոռու մարզի Ապավեն գյուղի ջրամատակարարման համակարգի վերակառուցման նախագծում», «Վորլդ Վիժն Ինտերնեյշնլ» միջազգային բարեգործական կազմակերպության կողմից իրականացվող «Խաղահրապարակների կառուցում ՀՀ Արագածոտնի մարզի Աշնակ և Արտենի համայնքների մանկապարտեզների բակերում», «Հայաստանի ֆուտբոլի ֆեդերացիա» իրավաբանական անձանց միության կողմից իրականացվող «Վ. Սարգսյանի անվան «Հանրապետական» մարզադաշտի վերանորոգում և կահավորում» ծրագրերը: Նիստում հաստատվել են «Հայկական Կարիտաս» բարեգործական հասարակական կազմակերպության կողմից իրականացվող «Շիրակի մարզի Ազատան գյուղի ոռոգման ջրագծի կառուցում» և «Շիրակի մարզի Լանջիկ գյուղի խմելու ջրագծի կառուցում», «Վերջին օրերի սրբերի բարեգործական կորպորացիայի հայաստանյան ներկայացուցչության» կողմից իրականացվող «Համայնքներին խմելու ջրամատակարարում» ծրագրերը ևս:
«Հալո Թրասթ» բրիտանական ոչ կառավարական բարեգործական կազմակերպության հայկական մասնաճյուղի կողմից իրականացվող ծրագրի նպատակն է` ականազերծել և անվտանգ դարձնել Լեռնային Ղարաբաղի Հանրապետության տարածքը:
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր:
