շաբաթ, 12 հոկտեմբերի 2002
Այսօր ՀՀ վարչապետ, Հայաստանի սոցիալական ներդրումների հիմնադրամի խորհրդի նախագահ Անդրանիկ Մարգարյանն ընդունել է «Վարդանանց ասպետներ» ամերիկահայ կազմակերպության ներկա և նախկին ավագ սպարապետներ Ջորջ Յակոբյանին և Չարլզ Թադևոսյանին։ Ավելի քան ութ տասնամյակ առաջ ԱՄՆ-ում հիմնված հայրենասիրական-բարեգործական այս կազմակերպությունը Հայաստանի սոցներդրումների հիմնադրամի հոգաբարձուների խորհրդի անդամ է և մեր երկրի անկախացումից հետո իր ակտիվ մասնակցությունն է բերում հայրենիքի վերաշինման գործին։ «Վարդանանց ասպետներն» արդեն շուրջ 500 հազար դոլարի ներդրումներ են կատարել հանրապետության սոցիալ-տնտեսական, կրթամշակութային տարբեր ոլորտներում։
Շնորհակալություն հայտնելով կազմակերպության ղեկավարներին անցած տարիների ընթացքում Հայաստանին ցույց տրված աջակցության համար, վարչապետ Անդրանիկ Մարգարյանը կարևորել է հատկապես այդ աջակցության նպատակային բնույթը ուղղված դպրոցների, հիվանդանոցների, ջրատարների շինարարությանը։
Հանդիպմանը կողմերն անդրադարձել են նաև համագործակցության հեռանկարներին։ Ուրվագծելով ապագա անելիքների հիմնական ուղղությունները, վարչապետը նշել է համայնքային ծրագրերի իրականացման մասնավորապես սահմանային ու բարձր լեռնային շրջաններում ճանապարհաշինության, դպրոցաշինության, ջրամատակարարման, գազիֆիկացման և մի շարք այլ ոլորտներում կատարվելիք ներդրումների կարևորությունը։
Շնորհակալություն հայտնելով վարչապետին ջերմ ընդունելության և անկեղծ զրույցի համար, «Վարդանանց ասպետների» ղեկավարները հավաստել են, որ այսուհետ ևս կազմակերպությունը ուժերի ներածին չափով, կմասնակցի հայրենիքում իրականացվող վերականգնողական ծրագրերին ի շահ հայ ժողովրդի բարեկեցության։
