երեքշաբթի, 5 օգոստոսի 2008
ՀՀ վարչապետ Տիգրան Սարգսյանն այսօր ընդունել է Արաբական Միացյալ Էմիրությունների (ԱՄԷ) Ռաս ալ-Խայմա Էմիրության թագաժառանգ, փոխկառավարիչ Շեյխ Սաուդ Բին Սակր Ալ Կասիմիին և նրա գլխավորած պատվիրակությանը:
Ողջունելով բարձրաստիճան հյուրին, վարչապետը վստահություն է հայտնել, որ նրա այցը նոր լիցք կհաղորդի Հայաստանի և Արաբական Միացյալ Էմիրությունների, մասնավորապես, Ռաս ալ-Խայմա Էմիրության միջև բարեկամական կապերի և համագործակցության զարգացմանը: Թագաժառանգ Շեյխ Սաուդ Բին Սակր Ալ Կասիմին շնորհակալություն է հայտնել ջերմ ընդունելության և այն օժանդակության համար, որ Հայաստանում ցուցաբերվում է իր երկրի բոլոր ներկայացուցիչների նկատմամբ: Նա ևս ընդգծել է Հայաստանի հետ կապերն ու հարաբերությունները սերտացնելու իր երկրի իշխանությունների պատրաստակամությունը, ինչի վկայությունը, ըստ նրա, Էմիրության տարբեր ընկերությունների կողմից Հայաստանում խոշոր ծավալի ներդրումներ կատարելու նախաձեռնություններն ու ծրագրերն են:
Զրույցի ընթացքում կողմերը գոհունակությամբ նշել են, որ արդեն իսկ խոստումնալից և գործնական հիմքեր են ստեղծվել մեր երկրի և Ռաս ալ-Խայմա Էմիրության միջև, որոնք ամրապնդման և խորացման լուրջ հեռանկարներ ունեն:
Վարչապետ Տիգրան Սարգսյանը ևս հավաստիացրել է, որ ՀՀ կառավարությունը պատրաստակամ է աջակցելու Էմիրության ընկերությունների կողմից Հայաստանում արդեն իսկ մեկնարկած ներդրումային ծրագրերի իրականացմանը: ՀՀ կառավարության ղեկավարը պատրաստակամություն է հայտնել համատեղ ուսումնասիրելու նաև հանքարդյունաբերության, զբոսաշրջության և այլ ոլորտներում համագործակցության, ինչպես նաև Հայաստանում ազատ տնտեսական գոտու ստեղծման հնարավորությունները` վստահություն հայտնելով, որ Ռաս ալ-Խայմա Էմիրության հետ համագործակցության հաջող փորձը վարակիչ կլինի նաև այլ երկրների ու դրանց ներդրողների համար:
