հինգշաբթի, 17 հոկտեմբերի 2002
Այսօր Երևանում բացվել է ԱՊՀ անդամ պետությունների սահմանապահ զորքերի հրամանատարների խորհրդի հիմնադրման 10-ամյակին նվիրված հոբելյանական 45-րդ նիստը, որին մասնակցել և ողջույնի խոսք է ասել ՀՀ վարչապետ Անդրանիկ Մարգարյանը։ Վարչապետը մեր երկրի համար մեծ պատիվ է համարել նման ներկայացուցչական համաժողովի անցկացումը Հայաստանում, որի անդամներն արդեն երկար տարիներ ապահովում են ԱՊՀ մասնակից պետությունների արտաքին սահմանների հուսալի պաշտպանությունը։ Ըստ նրա, իր ստեղծման օրվանից, հրամանատարների խորհուրդը իրեն դրսևորել է որպես արդյունավետ, լավ կազմակերպված միջպետական մի մարմին, որի գործունեությունն ուղղված է ԱՊՀ անդամ պետությունների սահմանապահ զորքերի համագործակցության ամրապնդմանն ու ինտեգրմանը։ Վարչապետը նշել է, որ բեղմնավոր գործակցության բազմամյա փորձը ԱՊՀ երկրների ժողովուրդներին միավորող բարեկամական կապերի անքակտելիության ցայտուն վկայությունն է։ Նշելով, որ վերջին տարիներին աշխարհում իրականացված մի շարք խոշոր ահաբեկչությունները ստիպում են նորովի գնահատել միջազգային ահաբեկչությունից, էքստրեմիզմից, անօրինական միգրացիայից ծագող վտանգները, Անդրանիկ Մարգարյանը կարևորել է բոլոր իրավապահ մարմինների, հատուկ ծառայությունների, սահմանային կառուցների ջանքերի համախմբումը այդ վտանգները դիմակայելու համար։ Հավաստելով այդ պայքարում ԱՊՀ անդամ պետությունների սահմանապահ զորքերի հրամանատարների խորհրդի մեծ ներդրումը, վարչապետը համոզմունք է հայտնել, որ ապագայում ևս այն հաջողությամբ կիրականացնի Համագործակցության երկրների արտաքին սահմանների հուսալի պաշտպանությունը. «Մենք ունենք ընդհանուր նպատակներ և ղեկավարվում ենք ինքնիշխանության ու փոխադարձ շահերի հարգման միասնական սկզբունքներով», -ասել է նա։
Անդրանիկ Մարգարյանն արդյունավետ աշխատանք է մաղթել նիստի մասնակիցներին ի շահ Համագործակցության անդամ երկրների ժողովուրդների բարգավաճման և խաղաղության ապահովման։
