երկուշաբթի, 7 հուլիսի 2008
ՀՀ վարչապետ Տիգրան Սարգսյանն այսօր ընդունել է Չեխիայի Հանրապետության արտաքին գործերի նախարար Կարել Շվարցենբերգին: Կարևորելով Չեխիայի հետ տարբեր բնագավառներում ձևավորված երկկողմ հարաբերությունների զարգացումը, վարչապետը նշել է, որ Հայաստանում հետաքրքրությամբ հետևում են այդ երկրում իրականացվող բարեփոխումներին, որոնք կարող են ուսանելի լինել մեզ համար: Տիգրան Սարգսյանը զրուցակցի հետ խոսել է նաև Եվրաինտեգրման գործընթացում Հայաստանին Չեխիայի կողմից մի շարք ուղղություններով աջակցության ակնկալիքների մասին: ՀՀ կառավարության ղեկավարը, մասնավորապես, նշել է ՀՀ պետծառայողների վարչական ունակությունների բարձրացման, բարեփոխումների գործընթացում ձեռք բերված չեխական փորձի փոխանցման և փորձագիտական օգնության ցուցաբերման, ՀՀ պետծառայողների համար եվրաինտեգրման հարցերով դասընթացների կազմակերպման ուղղությունները:
Տիգրան Սարգսյանը և Կարել Շվարցենբերգն անդրադարձել են նաև տնտեսական ոլորտում համագործակցության ընդլայնման անհրաժեշտությանը: ՀՀ վարչապետը կարևորել է հատկապես մասնավոր ներդրումների` երկուստեք խթանման խնդիրը, որին կարող են նպաստել գործարար համաժողովի կազմակերպումը, միմյանց հետ երկու երկրների գործարար շրջանակների շփումների ակտիվացումը: Հանդիպման ժամանակ ՀՀ կառավարության ղեկավարը նշել է, որ Հայաստանը շահագրգռված է Չեխիայի Հանրապետության հետ պաշտպանության ոլորտում ևս համագործակցություն զարգացնելու:
Երկուստեք կարևորվել է նաև միջազգային կազմակերպությունների շրջանակներում հայ-չեխական փոխգործակցությունը: