չորեքշաբթի, 2 հուլիսի 2008
ՀՀ վարչապետ Տիգրան Սարգսյանն այսօր կառավարությունում հանդիպում է ունեցել բնապահպանական խնդիրներով զբաղվող Հասարակական էկոլոգիական դաշինքի անդամների հետ` քննարկելու բնապահպանական խնդիրներ, մասնավորապես` Հայաստանի կայուն զարգացման հիմնահարցերը, Երևանում քաղաքաշինության և էկոլոգիական իրավիճակը, Սևանա լճի հիմնախնդիրները և ՀՀ կենսաբազմազանության պահպանության, հատուկ պահպանվող տարածքների, անտառների հետ կապված խնդիրները: ՀԿ-ների ներկայացուցիչները նշել են, որ հիշյալ բոլոր խնդիրներն անհրաժեշտ է դիտարկել կայուն զարգացման հայեցակարգի ներքո և լուծումներ գտնել Հայաստանի կողմից ստանձնած կայուն զարգացման պարտավորությունների շրջանակներում: Նրանք կարևորել են դեռևս 2002թ. ՀՀ կառավարության որոշմամբ ստեղծված ՀՀ կայուն զարգացման ազգային խորհրդի գործունեության ակտիվացումը:
Առկա խնդիրներն ամբողջ սրությամբ և հանգամանորեն ներկայացնելուց հետո, էկոլոգիական դաշինքի անդամները շնորհակալություն են հայտնել ՀՀ վարչապետին` բնապահպանական խնդիրներին հետևողականորեն ուշադրություն դարձնելու և դրանք հասարակական կազմակերպությունների հետ քննարկելու, համատեղ լուծումներ գտնելու պատրաստակամության համար, նշելով, որ մինչ այժմ ՀԿ-իշխանություններ ոչ արդյունավետ համագործակցության արդյունքում են առաջացել նշված տագնապահարույց խնդիրների մեծ մասը:
Հիշելով ՀՀ վարչապետ Տիգրան Սարգսյանի` վերջերս ՀՀ ԳԱԱ-ում արված շեշտադրումները և գոհունակություն հայտնելով այդ կապակցությամբ, ՀԿ-ների ներկայացուցիչները համաձայնել են, որ այս ոլորտում կուտակված բազմաթիվ խնդիրները հնարավոր կլինի լուծել համակարգային փոփոխությունների, օրենքի գերակայության և կառավարման գիտական հիմքերի ամրապնդման ուղղությամբ ակտիվ աշխատանք տանելու պարագայում:
Ամփոփելով հանդիպումը, վարչապետն ասել է, որ ինքը ևս մտահոգված է ներկայացված խնդիրներով և մի շարք հարցերում իրեն համարում է բնապահպանական ՀԿ-ների համախոհը: Որպեսզի համագործակցությունը լինի ինստիտուցիոնալ և արդյունավետ, Տիգրան Սագսյանը ևս կարևորել է ՀՀ կայուն զարգացման ազգային խորհրդի աշխատանքի ակտիվացումը, խոստանալով պարբերաբար խորհրդի նիստեր հրավիրել և համատեղ ձևավորել քննարկվելիք հարցերի օրակարգը: Վարչապետն ընդունել է ևս մի քանի ՀԿ-ների ներգրավմամբ խոհրդի կազմն ընդլայնելու մասին Էկոդաշինքի ներկայացուցիչների առաջարկը:
