երեքշաբթի, 10 հունիսի 2008
Այսօր կառավարությունում տեղի է ունեցել 1988թ. դեկտեմբերի 7-ի երկրաշարժի 20-ամյա տարելիցին նվիրված միջոցառումների կազմակերպման պետական հանձնաժողովի նիստ, որը վարել է հանձնաժողովի նախագահ, ՀՀ վարչապետ Տիգրան Սարգսյանը: Վարչապետը նշել է, որ հանձնաժողովի քննարկմանն են ներկայացվում ՀՀ կառավարության առաջիկա արտագնա նիստի օրակարգում ներառված աղետի գոտու վերաբերյալ հարցերի նախագծերը` հանձնաժողովի անդամների դիտողություններն ու առաջարկությունները մինչև նիստն ստանալու և այդ փաստաթղթերում ներառելու նպատակով:
Հանձնաժողովը, ըստ այդմ, քննարկել է Աղետի գոտու բնակավայրերում երկրաշարժի հետևանքով անօթևան մնացած ընտանիքների բնակարանային խնդիրների լուծման հայեցակարգը, որը ներկայացրել է ՀՀ քաղաքաշինության նախարար Վարդան Վարդանյանը: Նշվել է, որ այն մշակվել է 1988թ. դեկտեմբերի 7-ին տեղի ունեցած երկրաշարժի 20-ամյա տարելիցին նվիրված միջոցառումների ծրագրի հիման վրա և ուղղված է ՀՀ կառավարության 2008թ. ապրիլի 28-ի N 380-Ա որոշմամբ հավանության արժանացած ՀՀ կառավարության 2008-2012թթ. ծրագրի դրույթների ապահովմանը: Հայեցակարգի նպատակը` նախկինում ընդունված որոշումների համաձայն իրականացված բնակարանային ապահովման ծրագրերի վերականգնողական աշխատանքների վերլուծության արդյունքներով պետական քաղաքականության սկզբունքների ձևավորումն է` ուղղված երկրաշարժից 20 տարի անց դեռևս անօթևանի կարգավիճակում գտնվող անձնաց բնակարանային խնդիրների լուծմանը` մինչև 2013թ.: Հայեցակարգը ներառում է ներկա վիճակի վերլուծությունը, երկրաշարժի հետևանքով անօթևան մնացած ընտանիքների բնակարանային խնդիրների լուծման առաջնահերթություններն ու ուղղությունները, դրանց լուծման համար անհրաժեշտ միջոցների գնահատականները, խնդիրների լուծմանն ուղղված աշխատանքների իրականացման կազմակերպչական սխեման, ինչպես նաև հայեցակարգի կիրարկումն ապահովող միջոցառումների ցանկը: Նշվել է, որ հայեցակարգը հիմք է հանդիսանում աղետի գոտու բնակավայրերում երկրաշարժի հետևանքով անօթևան մնացած ընտանիքների բնակարանային խնդիրների լուծմանն ուղղված ծրագրերի մշակման համար:
Նիստում ներկայացվել է պետական հանձնաժողովի կողմից մշակված «1988թ. դեկտեմբերի 7-ին Հայաստանում տեղի ունեցած երկրաշարժի 20-ամյա տարելիցին նվիրված միջոցառումների ծրագրի» շրջանակներում նախատեսված մշակութային միջոցառումների վերաբերյալ հաշվետվություն ևս:
Խորհրդին զեկուցվել է նաև ՀՀ նախագահի հրամանագրով ստեղծված պետական հանձնաժողովի կողմից 2008թ. հունվարին հաստատված միջոցառումների վերոնշյալ ծրագրի իրականացման ընթացքի մասին:
