ուրբաթ, 6 հունիսի 2008
ՀՀ վարչապետ Տիգրան Սարգսյանն այսօր ընդունել է ՄԱԿ-ի մշտական համակարգող, ՄԱԶԾ-ի մշտական ներկայացուցիչ Կոնսուելո Վիդալին:
Ողջունելով հյուրին, վարչապետը նշել է, որ Հայաստանը չափազանց կարևորում է մեր երկրում ՄԱԿ-ի տարբեր գործակալությունների կողմից տարիներ շարունակ իրականացվող ծրագրերը, որոնք ներառում են մարդկանց կյանքի համար արժանավայել պայմանների ստեղծմանը նպաստող ամենատարբեր ոլորտներ: Տիգրան Սարգսյանը հավաստել է Հայաստանի կառավարության պատրաստակամությունը` ՄԱԿ-ի մշտական համակարգողի գործունեության և կազմակերպության առաքելության լիարժեք իրականացման համար մեր երկրում բարենպաստ պայմաններ ապահովելու գործում:
Տիկին Կոնսուելո Վիդալը ՀՀ վարչապետին է ներկայացրել Հայաստանում ՄԱԿ-ի մեկ տասնյակից ավելի գործակալությունների գործունեությունն ու ծրագրերը, նշելով, որ իրենց ցանկությունն է, որպեսզի դրանք լավագույնս և առավել արդյունավետությամբ օգտագործվեն` ի բարօրություն Հայաստանի ու նրա ժողովրդի: ՄԱԿ-ի մշտական համակարգողը նշել է, որ ներկայումս մշակվում է Հայաստանի հետ համագործակցության նոր` քառամյա ծրագիր և ընդգծել, որ ակնկալում է ՀՀ կառավարության ու նրա ղեկավարի օժանդակությունը ծրագրի մշակման գործընթացում, որպեսզի առավել անհրաժեշտ և կառավարության համար առաջնահերթություն համարվող ուղղությունները ներառվեն ծրագրում: «Մենք քաղաքականապես չեզոք կազմակերպություն ենք և հավատում ենք, որ զարգացմանն ուղղված մեր ջանքերը կնպաստեն հասարակության բևեռացվածության խնդրի լուծմանը նույնպես», - ասել է ՄԱԿ-ի մշտական համակարգողը: Այդ տեսակետից, ի թիվս մի շարք այլ ոլորտներում նախատեսվող ծրագրերի, կարևորվել են տարածքային զարգացման, մասնավոր հատված-պետություն համագործակցության, փոքր և միջին ձեռնարկության խթանման, կոռուպցիայի դեմ պայքարի, կրթության ոլորտի բարեփոխումների հետ կապված ծրագրերը:
ՀՀ կառավարության ղեկավարը խոսել է նաև դոնոր կազմակերպությունների և երկրների կողմից առաջարկվող աջակցության ծրագրերի համակարգման անհրաժեշտության մասին, որպեսզի այդ աջակցությունն առավել արդյունավետ օգտագործվի և զերծ լինի կրկնություններից: ՀՀ վարչապետը վստահություն է հայտնել, որ նաև ՄԱԿ-ի աջակցությամբ ՀՀ կառավարությունը կկարողանա իրագործել նախատեսված բոլոր հավակնոտ ծրագրերը:
