երեքշաբթի, 3 հունիսի 2008
ՀՀ վարչապետ Տիգրան Սարգսյանն այսօր հանդիպում է ունեցել Համաշխարհային բանկի տարածաշրջանային տնօրեն Դոննա Դաուսեթ-Կոիրոլոյի և Հայաստանում ՀԲ գրասենյակի ներկայացուցիչների հետ: Հանդիպմանը, որին մասնակցել են նաև ՀՀ նախագահի տնտեսական հարցերով գլխավոր խորհրդականը, ՀՀ ֆինանսների, էկոնոմիկայի, արդարադատության, կրթության և գիտության, առողջապահության, աշխատանքի և սոցիալական հարցերի նախարարներն ու ՀՀ ԿԲ-ի նախագահի տեղակալը, ՀՀ կառավարությանն առընթեր հարկային պետական ծառայության և մաքսային պետական կոմիտեի ղեկավարները, ներկայացվել է Համաշխարհային բանկի զեկույցը` Հայաստանում 2008-2012թթ.-ին զարգացման քաղաքականության տարբերակների ընտրության վերաբերյալ: Զեկույցի նպատակն է` տնտեսական աճի և աղքատության կրճատման ուղղությամբ արձանագրված ուշագրավ արդյունքները զարգացնելու Հայաստանի ջանքերին զուգահեռ, ներկայացնել մեր երկրի առջև ծառացած մարտահրավերներին դիմագրավելու քաղաքականության հիմնական տարբերակները: ՀԲ-ի տարածաշրջանային տնօրենի հավաստմամբ, ՀՀ նոր կառավարության ծրագրի և վերանայման գործընթացում գտնվող Աղքատության հաղթահարման ռազմավարական ծրագրի հետ մեկտեղ, ՀԲ-ի վերոնշյալ զեկույցը դիտվում է նաև` որպես ՀԲ-ի և ՀՀ-ի միջև առաջիկա չորս տարիների համագործակցության հիմք:
Ըստ ոլորտների հանգամանորեն ներկայացված զեկույցի համար շնորհակալություն հայտնելով և այն համարելով բանկի կողմից պատրաստված կարևոր ու մեծ աշխատանք, վարչապետ Տիգրան Սարգսյանը նշել է, որ ներկայացվածը, ընդհանուր առմամբ, համահունչ է կառավարության ծրագրին, կան որոշակի խնդիրներ, որոնց վերաբերյալ կառավարության մոտեցումներն ամրագրելու նպատակով, պահանջվում են լրացուցիչ քննարկումներ: Վարչապետի մոտ այդ քննարկումներն անցկացնելուց և արդյունքներն ամփոփելուց հետո, դրանք կներկայացվեն ՀԲ-ին:
