երեքշաբթի, 27 մայիսի 2008
ՀՀ վարչապետ Տիգրան Սարգսյանն այսօր ընդունել է «ՎՏԲ Բանկ» ԲԲԸ-ի նախագահ Անդրեյ Կոստինին:
Վարչապետը նշել է, որ «ՎՏԲ Բանկ» ԲԲԸ-ի նախագահի այցը Հայաստան և նրա մշտական ուշադրությունը Հայաստանում այդ բանկի գործունեության նկատմամբ հույս է ներշնչում, որ տնտեսական համագործակցությունը ևս նույնպիսի արդյունավետությամբ կզարգանա և կհասնի քաղաքական հարաբերությունների այն բարձր մակարդակին, որը գոյություն ունի Հայաստանի և Ռուսաստանի միջև:
Համաձայնելով վարչապետի տեսակետին, Անդրեյ Կոստինը ներկայացրել է «ՎՏԲ Բանկ»-ի զարգացման առաջիկա ծրագրերը, որոնք վերաբերում են նաև Հայաստանում տարբեր ոլորտներում ներդրումային որոշակի փոխշահավետ նախագծերի իրականացմանը: Բանկի նախագահը գոհունակությամբ է խոսել մեր երկրում գործունեություն ծավալած «ՎՏԲ Բանկ»-ի հաջողությունների և բանկի կողմից նախապատրաստված ներդրումային փաթեթի մասին, ընդգծելով, որ այդ ամենը երկկողմ սերտ հարաբերությունների և Հայաստանի ներդրումային բարենպաստ միջավայրի վկայությունն է:
ՀՀ կառավարության ղեկավարը և «ՎՏԲ Բանկ» ընկերության նախագահը խոսել են նաև համընդհանուր բնույթ կրող ներկայիս տնտեսական հիմնախնդիրների, այդ թվում` ինֆլյացիոն երևույթների, ինչպես նաև բանկային համակարգի կողմից դրանց արձագանքելու հնարավորությունների մասին:
Պարոն Կոստինը ՀՀ վարչապետին ներկայացրել է նաև Թեղուտի պղինձ-մոլիբդենային հանքավայրի շահագործմանն ուղղված վարկային ծրագիրն ու դրա վերաբերյալ «Թեղուտ» ԲԲԸ-ի հետ ստորագրվելիք համաձայնագրի հիմնական դրույթները:
Հանդիպումից հետո տեղի է ունեցել վարկային համաձայնագրի ստորագրման արարողությունը: Այն ստորագրել են «ՎՏԲ Բանկ» ԲԲԸ-ի նախագահ Անդրեյ Կոստինը և «Թեղուտ» ՓԲԸ-ի նախագահ Վալերի Մեջլումյանը:
