երկուշաբթի, 26 մայիսի 2008
ՀՀ վարչապետ Տիգրան Սարգսյանն այսօր ընդունել է Ճապոնիայի արտակարգ և լիազոր դեսպան Յասուո Սաիտոյին:
Վարչապետը բարձր է գնահատել Ճապոնիայի կառավարության կողմից Հայաստանի կառուցվածքային և տնտեսական բարեփոխումների իրականացման, ենթակառուցվածքների զարգացման գործում և մի շարք այլ ոլորտներում տարիներ շարունակ Հայաստանի կառավարությանը և ժողովրդին ցուցաբերված աջակցությունը` շնորհակալություն հայտնելով արդյունավետ համագործակցության ու օժանդակության համար: Վարչապետը կարևորել է նաև մայիսի 27-ին ՀՀ էներգետիկայի և բնական պաշարների նախարարի հետ ստորագրվելիք հայտագիրը` «ՀՀ տնտեսական կայունացման և զարգացման ջանքերն ուժեղացնելու նպատակով 2005թ. մարտի 29-ի հայտագրերի փոխանակմամբ տրամադրված վարկի գումարի փոփոխության մասին», որի շրջանակներում նախատեսվում է էներգետիկայի զարգացման նպատակով լրացուցիչ միջոցների հատկացում, ինչը այս ոլորտում արդյունավետ համագործակցության և Հայաստանի էներգետիկ անվտանգության բարձրացման ուղղությամբ կատարվող ևս մեկ կարևոր քայլ է: Տիգրան Սարգսյանը կարևորել է միջկառավարական հանձնաժողովի աշխատանքի ակտիվացումը, որը, նրա համոզմամբ, փոխադարձ հետաքրքրություն ներկայացնող հարցերի քննարկման, աշխատանքի համակարգման լավ հնարավորություն է ընձեռում և կարող է դառնալ նոր ծրագրերի, փոխգործակցության նոր ոլորտների վերաբերյալ առաջարկությունների ներկայացման միջոց: Վարչապետը նշել է հատկապես զբոսաշրջության, գիտատեխնիկական, փոքր ու միջին ձեռնարկատիրության և այլ ոլորտներում համատեղ փոխշահավետ ծրագրերի իրագործման հեռանկարայնությունը:
Հանդիպման ընթացքում երկուստեք կարևորվել է Ճապոնիայում Հայաստանի դեսպանության բացումը: Դեսպան Յասուո Սաիտոն նշել է, որ իր երկիրը պատրաստակամ է այս հարցում հնարավորինս աջակցելու Հայաստանին` նկատի առնելով, որ դեսպանության բացմամբ հայ-ճապոնական հարաբերություններն ավելի կամրապնդվեն: Անդրադարձ է կատարվել միջազգային ասպարեզում, այդ թվում` ՄԱԿ-ի շրջանակներում համագործակցությանն առնչվող հարցերի ևս:
