երեքշաբթի, 13 օգոստոսի 2002
Այսօր ՀՀ վարչապետ Անդրանիկ Մարգարյանն ընդունել է ԱՄՆ Կոնգրեսի Ներկայացուցիչների պալատի անդամ Ֆրենկ Փաուելին, որը տարածաշրջանում է գտնվում ԼՂՀ նախագահի ընտրություններին ներկա լինելու և Հայաստանում հայ-ամերիկյան փոխադարձ հետաքրքրություն ներկայացնող մի շարք հարցերի քննարկման նպատակով: Ֆրենկ Փաուելը նշել է, որ չափազանց տպավորված է ԼՂՀ նախագահական ընտրությունների ընթացքից, որոնք աչքի են ընկել բարձր կազմակերպվածությամբ և թափանցիկությամբ: ԱՄՆ կոնգրեսականն իր առաքելության նպատակներից է համարել ամերիկյան ԶԼՄ-ներում ևս հնչեցնելու ԼՂՀ-ում արդար ընտրությունների անցկացման փաստը:
Վարչապետ Անդրանիկ Մարգարյանն ընդգծել է, որ ԼՂՀ-ում կայացած ընտրությունների բաց ու հրապարակային ընթացքը երաշխիքներից մեկն է այն բանի, որ մոտ ապագայում միջազգային հանրությունը ճիշտ ու ամբողջական պատկերացում կունենա Լեռնային Ղարաբաղի Հանրապետությունում տեղի ունեցող գործընթացների վերաբերյալ: Շնորհակալություն հայտնելով ԱՄՆ իշխանություններին Հայաստանին տրամադրվող օգնության, ԼՂ հակամարտութան խաղաղ կարգավորման, տարածաշրջանային կայունության պահպանման ուղղությամբ ներդրած ջանքերի համար, Անդրանիկ Մարգարյանը միաժամանակ նշել է, որ հատկապես հայ-ամերիկյան տնտեսական հարաբերությունները դեռևս զարգացման մեծ հնարավորություններ ունեն:
Հանդիպման վերջում կողմերը հավաստել են քաղաքական, տնտեսական և բազմակողմ այլ կապերի ու հարաբերությունների հետագա խորացման երկու պետությունների պատրաստակամությունը:
