ուրբաթ, 18 ապրիլի 2008
ՀՀ վարչապետ Տիգրան Սարգսյանն այսօր այցելել է ՀՀ քաղաքաշինության, մշակույթի, կրթության և գիտության նախարարություններ և դրանց աշխատակազմերին ներկայացրել նորանշանակ նախարարներ Վարդան Վարդանյանին, Հասմիկ Պողոսյանին և Լևոն Մկրտչյանին:
Ներկայացնելով նորանշանակ նախարար Վարդան Վարդանյանին և վերստին շնորհավորելով նրան նախարարի պաշտոնում վերանշանակվելու կապակցությամբ, ՀՀ կառավարության ղեկավարը համոզմունք է հայտնել, որ նա արժանիորեն կշարունակի ղեկավարել նախարարության աշխատանքը, լուծել նախարարության առջև ծառացած խնդիրները: Տիգրան Սարգսյանը, մասնավորապես, նշել է.
«Նախարարը կարողացել է շատ կարճ ժամանակահատվածում ձևավորել այնպիսի մթնոլորտ իր անձի շուրջ և աշխատանքային կոլեկտիվում, որը հնարավորություն է տալիս մեզ լիակատար վստահություն ունենալ իր անձի նկատմամբ և համոզված լինել, որ ձեր նախարարության առջև դրված խնդիրներն ու նպատակները դուք ի վիճակի եք իրագործել: Ես ուզում եմ հավաստիացնել ձեզ, որ մենք կառավարությունում նույնպես ձևավորելու ենք այդպիսի մթնոլորտ` թիմային աշխատանքի մթնոլորտ: Առանց թիմային աշխատանքի չենք կարողանալու հաղթահարել այն բարդագույն խնդիրները, որ մեր առջև այսօր կանգնած են: Քաղաքաշինության ոլորտում, թերես, ամենաարդիական խնդիրը կայանում է նրանում, որ մի կողմից` մենք պետք է ի վիճակի լինենք պահպանել այն հարուստ ժառանգությունը, որ ունենք, մյուս կողմից` ներդնել ժամանակակից ստանդարտներ և մոտեցումներ: Համաձայնենք, որ այստեղ կան լուրջ բացթողումներ, և մենք համոզված ենք, որ պարոն Վարդանյանը, ձեզ հետ միասին, կարող է բեկում մտցնել այս ոլորտում` արդիականացնելով քաղաքաշինության մեր քաղաքականությունը: Դրա կարիքը, կարծում եմ, բոլորս տեսնում ենք, որ այսօր կա: Ես ևս մեկ անգամ ուզում եմ ձեզ հավաստիացնել, որ բոլոր այն ծրագրերը, որոնք կմշակվեն ձեր նախարարության կողմից և կարժանանան կառավարության ուշադրությանը, մենք համատեղ այդ ամենը կդարձնենք իրականություն»:
