ուրբաթ, 18 ապրիլի 2008
ՀՀ վարչապետ Տիգրան Սարգսյանն այսօր ընդունել է Հայաստանում Արժույթի միջազգային հիմնադրամի մշտական ներկայացուցիչ Նինկե Օմեսին և նրա գլխավորած պատվիրակությանը:
Հանդիպման սկզբում ԱՄՀ մշտական ներկայացուցիչը նախ շնորհավորել է Տիգրան Սարգսյանին` ՀՀ վարչապետի պաշտոնում նշանակվելու կապակցությամբ և մաղթել հաջողություններ: Զրուցակիցները քննարկել են ՀՀ կառավարության և ԱՄՀ-ի համագործակցությանն առնչվող հարցեր: Երկուստեք ընդգծվել է հարկային և մաքսային ոլորտներում բարեփոխումների անհրաժեշտությունը և անդրադարձ է կատարվել այդ նպատակով իրականացվելիք քայլերին: Հիշյալ ոլորտներում կադրերի մասնագիտական ունակությունների բարձրացման և կատարելագործման նպատակով, վարչապետը կարևորել է նաև մշտական բնույթ կրող վերապատրաստումների անցկացումը, արատավորված անձանցից ձերբազատվելը, բանիմաց և գրագետ երիտասարդ կադրերով համակարգը համալրելն ու հրապարակային գործունեության ապահովումը: Վարչարարության կատարելագործման հիմնական գործիքը, վարչապետ Տիգրան Սարգսյանի հավաստմամբ, առաջին հերթին, հասարակական վերահսկողությունն է, որը ըստ նրա, նաև Հանրապետության նախագահի մոտեցումն է:
Հանդիպման ավարտին ԱՄՀ ներկայացուցիչը պատրաստակամություն է հայտնել, ԿԲ-ի հետ հիմնադրամի արդյունավետ փոխգործակցության օրինակով, շարունակել ՀՀ կառավարության ղեկավարի և նոր ձևավորվելիք կառավարության հետ համագործակցությունը:
