հինգշաբթի, 17 ապրիլի 2008
Ներկայացնելով ՀՀ արդարադատության նախարար Գևորգ Դանիելյանին, ՀՀ վարչապետը բարձր է գնահատել նրա մասնագիտական ունակություններն ու մարդկային արժանիքները, նշելով, որ այդ ամենը նա ձեռք է բերել իր երկարատև աշխատանքի շնորհիվ: Վարչապետը համոզմունք է հայտնել, որ այն խնդիրները, որ դրված են արդարադատության նախարարության առջև, պարոն Դանիելյանը, նախարարության աշխատակազմի հետ միասին, ի վիճակի է լուծել։ Խոսելով այդ խնդիրների մասին, Տիգրան Սարգսյանը, մասնավորապես, ասել է.
«Գաղտնիք չէ, որ արդարադատության նախարարության դերը և նշանակությունը արդյունավետ կառավարություն ունենալու գործում չափազանց կարևոր է։ Այն խնդիրները, որոնք դրված են ձեր առջև, հնարավորություն են տալիս բացահայտելու մեր կառավարման համակարգի բոլոր թերությունները։ Միանշանակ բացահայտվում են այն նախարարությունները, որոնք ունեն օրինաստեղծ ոլորտում պրոբլեմներ, որոնք ունեն պրոբլեմներ կառավարման արդյունավետ համակարգի, և սա նշանակում է, որ եթե արդարադատության նախարարությունը Հայաստանի Հանրապետությունում աշխատի արդյունավետ, մենք կկարողանանք առողջացնել մեր համակարգը։
Գաղտնիք չէ, որ ընդհանրապես արդարադատության նկատմամբ Հայաստանի Հանրապետությունում կան բազմաթիվ տեսակետներ և լուրջ քննադատություն։ Հասարակության մեջ դեռևս իշխում են այն տրամադրությունները, որ մեզ չի հաջողվել Հայաստանի Հանրապետությունում ձևավորել այնպիսի իրավական համակարգ, որ մարդն իրեն պաշտպանված զգա, որ մեր երկրում գերիշխեն օրենքները: Կարծում եմ, այս հոգեբանական բարդույթը և այս հոգեբանական իրավիճակը, որ ստեղծված է մեր հասարակության մեջ, մենք ձեզ հետ միասին, համատեղ նվիրված աշխատանքով պետք է կարողանանք հաղթահարել։ Ես համոզված եմ, որ պարոն Դանիելյանն այն անձնավորությունն է, ով կարող է այս խնդիրը լուծել՝ ձեզ հետ միասին և, բնականաբար, կառավարության թիմային աշխատանքի շնորհիվ։
Ես ուզում եմ ձեր ուշադրությունը հրավիրել նաև այն հանգամանքի վրա, որ ՀՀ նախագահի նախընտրական ծրագրում կա մի էական շեշտադրում. այն է՝ մեր կառավարման համակարգի արդյունավետության բարձրացումը։ Եվ Հանրապետության նախագահը հենց դրա հետ է կապում կոռուպցիայի դեմ, ստվերային տնտեսության դեմ արդյունավետ պայքարը: Առանց կառավարման համակարգի լուրջ բերափոխումների, մենք այս ոլորտում հաջողություն, բնականաբար, չենք կարող ունենալ։ Իսկ այս գործում հենց ձեր նախարարության դերը և նշանակությունը ամենակարևորն է։ Մենք սերտորեն պետք է համագործակցենք ձեզ հետ` նպատակ ունենալով բարձրացնել արդարադատության նախարարության աշխատակիցների հեղինակությունը։ Պատվաբեր պետք է լինի երիտասարդ մասնագետների համար` աշխատել արդարադատության նախարարությունում, հնարավորություն ունենալով կերտել նոր, ամուր պետականություն։ Ցավոք, աշխատավարձերի մակարդակը համակարգում դեռևս ցածր է, որը լուրջ խոչընդոտ է առաջին հերթին երիտասարդ մասնագետներ ներգրավելու առումով, և մենք, նախարարի հետ միասին, պետք է այս հիմնարար խնդրի լուծումները գտնենք, որպեսզի նախարարությունում աշխատեն տաղանդավոր երիտասարդներ և հասարակության վերաբերմունքը փոխվի պետական համակարգում աշխատողի նկատմամբ։ Ես համոզված եմ, որ այդ միջավայրը մենք կստեղծենք. արդարադատությունում աշխատելը պետք է լինի պատվաբեր, պետք է ձգտեն ձեզ մոտ աշխատել։ Եվ եթե այդպիսի տրամադրություններ իշխեն մեր հասարակության մեջ, կարծում եմ, որ արդարադատության նախարարության աշխատանքները դրանից միայն կշահեն։
Ես ուզում եմ պարոն Դանիելյանին ցանկանալ հաջողություն, վերստին շնորհավորել այս նշանակման կապակցությամբ, և ցանկանում եմ ձեզ բոլորիդ այնպիսի տրամադրություն, ոգևորվածություն, որը մեզ կօգնի այն բարդ խնդիրները, որ մեր առջև կանգնած են, լուծել»։
