շաբաթ, 22 մարտի 2008
ՀՀ նորընտիր նախագահ, վարչապետ Սերժ Սարգսյանն այսօր ընդունել է Չինաստանի Ժողովրդական Հանրապետության Սինցզյան-Ույգուրսկի ինքնավար շրջանը ներկայացնող գործարարների պատվիրակությանը: Հանդիպմանը մասնակցել են նաև կոալիցիոն գործընկեր և գործարար Գագիկ Ծառուկյանը, ՀՀ ԿԲ նախագահ Տիգրան Սարգսյանը:
Պատվիրակության անունից, արտաքին առևտրի և տնտեսական համագործակցության գերատեսչության ղեկավար Ժանգ Յեն նախ շնորհավորել է Սերժ Սարգսյանին՝ ՀՀ նախագահ ընտրվելու կապակցությամբ և մաղթել նրան հաջողություններ: Ներկայացնելով այցի նպատակը, նա նշել է, թե Սինցզյան-Ույգուրսկի ինքնավար շրջանը մտադրություն ունի ամրապնդել և զարգացնել Հայաստանի հետ տնտեսական կապերն ու ներդրումներ կատարել հայաստանյան տնտեսության մեջ: Վարչապետը ողջունել է հյուրերին և ընդգծել, որ Չինաստանի հետ մեր երկրի քաղաքական կապերը, ինչպես նաև տնտեսության և այլ ոլորտներում գործակցությունը տարեցտարի ամրապնդվում են: Գործարարների այսպիսի ներկայացուցչական պատվիրակության այցը Հայաստան, ըստ Սերժ Սարգսյանի, վկայում է հայաստանյան շուկայի նկատմամբ հետաքրքրության մեծացման մասին: Սերժ Սարգսյանը ցանկացած երկրի համար՝ մեծ թե փոքր, կարևորել է նպաստավոր գործարար միջավայրն ու մրցունակությունը, ընդգծելով, որ Հայաստանի կառավարությունն այդ ուղղությամբ լուջ քայլեր է ձեռնարկում:
Հանդիպման ընթացքում ՉԺՀ պատվիրակության ներկայացուցիչները ՀՀ վարչապետի հետ քննարկել են հանքարդյունաբերության, մետալուրգիայի և մի շարք այլ ոլորտներում փոխշահավետ համագործակցության հարցեր:
