հինգշաբթի, 20 հունիսի 2002
Երևանի ճարտարապետության և շինարարության պետական համալսարանի 80-ամյակի առթիվ ՀՀ վարչապետ Անդրանիկ Մարգարյանը շնորհավորական ուղերձ է հղել բուհի ղեկավարությանը, պրոֆեսորադասախոսական անձնակազմին և ուսանողությանը, որտեղ մասնավորապես ասված է. «Ջերմորեն շնորհավորում եմ հանրապետության ճարտարապետության և շինարարության բնագավառի առաջատար կրթօջախի 80-ամյակի առթիվ: Իր կենսագրությունն սկսելով մայր բուհի՝ Երևանի պետական համալսարանի տեխնիկական ֆակուլտետից, այնուհետև՝ 1930թ.-ից արդեն շինարարության ինստիտուտի կարգավիճակ ստանալով, հաստատությունը ոչ միայն հարազատ է մնացել հայ ճարտարապետական մտքի բազմադարյա ավանդույթներին, այլև նրա ճանաչված մանկավարժների ու մասնագետների մի քանի սերունդների ջանքերով դրվել են շինարարության և ճարտարապետության ազգային նոր դպրոցի հիմքերը:
Վստահ եմ, որ համալսարանի այսօրվա ու վաղվա շրջանավարտները կհամալրեն որակյալ շինարարների ու ճարտարապետների, իրենց գործի իսկական մասնագետների շարքերը, որոնց ստեղծագործական մտքի ու վարպետության շնորհիվ մեր երկիրը, մայրաքաղաք Երևանը նոր, արդի ժամանակներին համահունչ տեսք կստանան:
Համալսարանի տնօրինությանը, մանկավարժական ամբողջ կոլեկտիվին և ուսանողությանը մաղթում եմ առողջություն, նորանոր հաջողություններ աշխատանքում և ուսման մեջ՝ հանուն հայկական քաղաքաշինության դպրոցի հետագա զարգացման, ի բարօրություն հայ ժողովրդի և հայոց անկախ պետականության»:
