հինգշաբթի, 6 մարտի 2008
ՀՀ վարչապետ Սերժ Սարգսյանն այսօր ընդունել է Հարավային Կովկասի հարցերով Եվրամիության հատուկ ներկայացուցիչ Պիտեր Սեմնեբիին և նրա գլխավորած պատվիրակությանը, որի կազմում են Հայաստանում Եվրոպական հանձնաժողովի ներկայացուցչության ղեկավար Ռաուլ Լուցենբերգերը, Հարավային Կովկասի հարցերով ԵՄ հատուկ ներկայացուցչի քաղաքական խորհրդատուներ Անդրեյ Դիդենկոն և Ռասա Օստրաուսկայտեն, ինչպես նաև Հայաստանում Ֆրանսիայի արտակարգ և լիազոր դեսպան Սերժ Սմեսովը:
Սեմնեբիի հետ հերթական հանդիպմանը Սերժ Սարգսյանը կրկին քննարկել է ետընտրական շրջանում Հայաստանի ներքաղաքական իրավիճակը: Պարոն Սեմնեբին ևս նշել է, թե լսելով ՀՀ կառավարության նիստում վարչապետի արած հայտարարությունը, շատ քաջալերված և ոգևորված է, մեծապես հուսով, որ հայտարարության մեջ արված շեշտադրումներն ու կոչը ելակետ կհանդիսանան հասարակության համախմբման, լարվածության թուլացման և երկրում կայունության հաստատման համար: Անդրադարձ է արվել նաև մայրաքաղաքում հայտարարված արտակարգ դրությանը, այդ պայմաններում` որոշակի սահմանափակումներին, և արտակարգ դրությունը հնարավորինս արագ հանելու կարևորությանը: Պիտեր Սեմնեբին խոսել է նաև որոշակի մտահոգությունների մասին, որոնք այս օրերին քննարկում է տարբեր քաղաքական ուժերի հետ իր հանդիպումների ժամանակ ևս:
Վարչապետը, հնչած մտահոգությունների վերաբերյալ, ներկայացրել է իր տեսակետները: Նա կրկին ընդգծել է, որ շահագրգիռ է ու պատրաստակամ համագործակցելու և քաղաքական երկխոսություն վարելու բոլոր այն մարդկանց, քաղաքական ուժերի հետ, ովքեր ճանաչում են մեր երկրի օրենքները և իրենք էլ պատրաստակամ են այդպիսի երկխոսության: «Նրանք, ովքեր խախտել են կամ կխախտեն օրենքը, պատասխան են տալու դրա համար: Մենք վճռական ենք մեր երկրում բարեփոխումներն արագ տեմպերով շարունակելու գործում և այդ ընթացքում պատրաստ ենք համագործակցել ցանկացած կառուցողական ուժի հետ»,- ընդգծել է Սերժ Սարգսյանը:
Հանդիպման ընթացքում անդրադարձ է արվել նաև ԼՂՀ-ի և Ադրբեջանի շփման գծում զինադադարի ռեժիմի խախտման դեպքին: Վարչապետը հանգամանորեն ներկայացրել է տեղի ունեցածը` ակնկալելով, որ իրավիճակին լավատեղյակ միջազգային կազմակերպությունների աջակցությամբ ևս հնարավոր կլինի այսուհետ խուսափել այդպիսի իրավիճակներից:
