Հայաստանի Հանրապետության Կառավարություն

 Սիրելի հայրենակիցներ,

Անցած նախագահական ընտրություններին հաջորդած անցանկալի զարգացումները լուրջ ներքաղաքական լարվածություն առաջացրեցին երկրում: Լևոն Տեր-Պետրոսյանի և իր մի խումբ արկածախնդիր համախոհների անպատասխանատու և անխոհեմ գործունեության հետևանքով կազմակերպված զանգվածային անկարգությունները հանգեցրին ՀՀ Նախագահի կողմից հրապարակված և Ազգային Ժողովի կողմից հավանության արժանացած որոշմանը Երևանում արտակարգ դրություն հաստատելու մասին:

Այդ իրադարձությունները ծանր հարված էին մեր պետականությանն ու մեր ժողովրդին: Անդառնալի կորուստները ծառայողական պարտքը կատարող ոստիկանության աշխատակիցների և ցուցարարների շարքերից, ավելի քան հարյուր վիրավորները, բարբարոսությունը, վայրագությունն ու թալանը ծանր բարոյահոգեբանական ցնցում պատճառեցին մեր ժողովրդին: Մենք ցավակցում ենք կույր ատելության զոհ դարձած մեր հայրենակիցների ընտանիքներին ու հարազատներին, մեր վշտակցությունն ենք հայտնում նրանց և մեր վճռականությունը` ամեն ինչ անելու, որ մեր երկրում այլևս այդպիսի դեպքեր չկրկնվեն: Նման եր—ույթների մերժումը կարող է անկեղծ լինել ու կրկնությունը կարող է կանխվել միայն մեկ դեպքում` եթե անաչառ ու ճիշտ քաղաքական, իրավական և բարոյական գնահատականներ են տրվում կատարվածին: Հետևաբար մենք պարտավոր ենք, զսպելով ցավը, ցասումն ու կսկիծը, գնահատել կատարվածը:

Դժբախտաբար, մենք չկարողացանք կանխել այն, ինչը հետևողականորեն, մեթոդաբար և դաժանորեն նախապատրաստվում էր Լև Տեր-Պետրոսյանի ու իր մի խումբ համախոհների կողմից, ովքեր տևական ժամանակ մարդկանց մեջ ներարկում էին կեղծիք, շանտաժ, այլատյացություն, անհանդուրժողականություն, չարություն ու ապօրինություն: Քաղաքական մրցակիցներին դավաճանի պիտակ կպցնելը, զազրելի հայհոյախոսությամբ անպատվելը, իր կոչերին չարձագանքող քաղաքացիներին տականք համարելը, ապօրինի հանրահավաքներ և երթեր անցկացնելը, Ազատության հրապարակում ապօրինի զենք, զինամթերք, հոգեմետ նյութեր, մահակներ ու երկաթյա ձողեր կուտակելը խոսում է վաղօրոք նախապատրաստված և կազմակերպված գործունեության մասին: Սուտ, կեղծիք ու ատելություն սերմանելը որև է առնչություն չի կարող ունենալ քաղաքական գործընթացների հետ: Դա կարող է հանգեցնել միայն նրան, ինչը տեղի ունեցավ մարտի 1-2-ին: Ընտրությունները առիթ դարձան Լևոն Տեր-Պետրոսյանի ու իր մի խումբ համախոհների համար` սեփական ժողովրդի ու պետության նկատմամբ 10 տարի շարունակ կուտակած կույր ատելությունը, վրեժն ու չարությունը բացառիկ ցինիզմով դրսևորելու համար: Կատարված վանդալիզմի ու ողբերգության ողջ պատասխանատվությունը կրում են Լևոն Տեր-Պետրոսյանն ու իր մի խումբ համախոհներ, որոնք ոչ միայն մերժում էին շարունակաբար հնչող հորդորները` հրաժարվելու քաղաքական շանտաժի, ատելության ու չարության քարոզից, քաղաքական խնդիրները քաղաքական ու իրավական միջոցներով լուծելու և երկխոսության առաջարկներից, այլև դժվարին պահին չկարողացան հաղթահարել սին և եսակենտրոն մղումները` հրաժարվելով անգամ Վեհափառ Հայրապետի հետ հանդիպումից:

Սիրելի հայրենակիցներ,

Մեծ է վիշտն ու ցավը, կորուստների կսկիծն ու կատարվածի պատճառած հոգեկան վերքը: Այդուհանդերձ, վերականգնելու համար մեր ժողովրդի հոգեկան անդորրը, երկրի կայունությունն ու բնականոն ընթացքը, մենք պարտավոր ենք մեր մեջ կամք և ուժ գտնել` ճիշտ լուծումներ գտնելու այս իրավիճակից դուրս գալու համար: Մենք վճռական ու հետևողական ենք լինելու մարդկային զոհերի հանգեցրած զանգվածային անկարգությունների կազմակերպիչներին և ուղղորդողներին բացահայտելու և օրենքի ամբողջ խստությամբ պատժելու հարցում: Մենք վճռական ենք, որպեսզի հնարավոր ամենակարճ ժամանակում բացահայտվի ու առգրավվի երկրում առկա ապօրինի զենքն ու զինամթերքը, երկրում ապահովվի օրենքի լիակատար գերակայություն` երաշխավորելով ժողովրդավարության անշրջելի զարգացումները:

Մենք վստահ ենք և վճռական, որ ձևավորվող նոր քաղաքական կոալիցիան ի զորու կլինի առաջիկայում իրականացնել նոր որակի ազգաշահ բարեփոխումներ, նպաստելով երկրի և ժողովրդի առջև ծառացած տարաբնույթ խնդիրների լուծմանը, դրանով իսկ նպաստելով սոցիալական համերաշխության կայացմանը և երկրի առաջընթաց զարգացմանը:

                                     Հայաստանի Հանրապետական Կուսակցության  նախագահ    ՍԵՐԺ ՍԱՐԳՍՅԱՆ

                                    «Բարգավաճ Հայաստան» կուսակցության  նախագահ ԳԱԳԻԿ ԾԱՌՈՒԿՅԱՆ

                                     Օրինաց Երկիր» Կուսակցության  նախագահ ԱՐԹՈՒՐ ԲԱՂԴԱՍԱՐՅԱՆ