ուրբաթ, 25 հունվարի 2008
ՀՀ վարչապետ Սերժ Սարգսյանն այսօր ընդունել է ՀՀ-ում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Էնթոնի Քենթորին, ով ավարտում է իր դիվանագիտական առաքելությունը մեր երկրում:
Շնորհակալություն հայտնելով պաշտոնավարման տարիներին հայ-բրիտանական հարաբերությունների զարգացման գործում դեսպանի ունեցած ավանդի և երկկողմ համագործակցության խորացմանն ուղղված ջանքերի համար, վարչապետը բարձր է գնահատել Միացյալ Թագավորության կառավարության աջակցությունը Հայաստանում ընթացող տնտեսական և ժողովրդավարական բարեփոխումներին և ցանկություն հայտնել առավել զարգացնել Միացյալ Թագավորության հետ Հայաստանի երկկողմ հարաբերությունները` համագործակցության բոլոր ուղղություններով: Ի պատասխան դեսպան Էնթոնի Քենթորն ասել է, թե դա նաև բրիտանական կողմի ցանկությունն է, որին է ուղղված եղել նաև անցած ավելի քան 2 տարվա իր աշխատանքը:
Հանդիպման ավարտին Սերժ Սարգսյանը հաջողություն է մաղթել դիվանագետին` հետագա գործունեության մեջ: