չորեքշաբթի, 10 ապրիլի 2002
Հայաստանում ՄԱԿ-ի մշտական համակարգող, ՄԱԿ-ի զարգացման ծրագրերի մշտական ներկայացուցիչ Ժոյել Բուտրուի խնդրանքով, այսօր նրան ընդունեց ՀՀ վարչապետ Անդրանիկ Մարգարյանը:
Պրն Բուտրուն անդրադարձավ Մոնթերեյի համաժողովի շրջանակներում քննարկված մի քանի կարևորագույն հարցերի ուղղությամբ հետագա աշխատանքին, որ վերաբերում է միջազգային օժանդակության համակարգմանը, նաև համաժողովից դուրս՝ ՀՀ վարչապետի և ՄԱԿ-ի զարգացման ծրագրի տնօրեն Մարկ Մալոխբրաունի միջև տեղի ունեցած առանձին հանդիպման զրույցի կետերին: Հայաստանում ՄԱԿ-ի մշտական համակարգող և զարգացման ծրագրերի մշտական ներկայացուցիչը տեղեկացրեց, որ 2-3 շաբաթից իր գլխավորած գրասենյակը կավարտի Հայաստանի հետ առաջիկա տարիներին համագործակցության ծրագրի մշակումը, որը բավականին ընդգրկուն է և ներառում է բազմաթիվ ոլորտներ՝ բնապահպանություն, սոցիալական հատված, աջակցություն տեղեկատվական տեխնոլոգիաների տարածմանը, ընտրությունների թափանցիկության ապահովում և այլն: Այդ աշխատանքների ավարտից հետո, որ իրականացվում է Հայաստանի համապատասխան կառույցների և ոլորտների պատասխանատուների հետ փոխգործակցության շրջանակներում, այն կներկայացվի ՀՀ կառավարության ղեկավարին:
Վարչապետ Անդրանիկ Մարգարյանը կրկին ընդգծեց աջակցություն ստացող երկրների նկատմամբ միջազգային տարբեր կազմակերպությունների կողմից ներկայացվող պահանջների, գնահատման չափորոշիչների ներդաշնակության անհրաժեշտությունը, որը թույլ կտա օբյեկտիվ պատկերացում ձևավորել երկրի մասին և հետագա գործունեությունն իրականացնելիս հիմնվել այդ գնահատականի վրա, ինչը միանգամայն ընդունելի էր պրն Բուտրուի համար: Խոսք եղավ նաև ծրագրերի կազմման ընթացքում տեղական ներուժը առավելագույնս օգտագործելու կարևորության մասին, որպեսզի ծրագրի վերջնական արդյունքն ու ակնկալիքը հետագայում համապատասխանեն միմյանց:
Միջազգային օժանդակության համակարգման և մի շարք այլ հարցերում վարչապետն անչափ կարևորեց ՄԱԿ-ի դերը և պատրաստակամություն հայտնեց շարունակել սերտ համագործակցությունը նրա կառույցների հետ՝ Հայաստանի սոցիալական, տնտեսական խնդիրները, որով մտահոգ է նաև Միացյալ Ազգերի Կազմակերպությունը, միասին, կազմակերպության աջակցությամբ լուծելու ակնկալիքով:
