չորեքշաբթի, 10 ապրիլի 2002
Այսօր ՀՀ վարչապետ Անդրանիկ Մարգարյանն ընդունեց Հայաստանում Գերմանիայի Դաշնային Հանրապետության նորանշանակ դեսպան Հանս-Վուլֆ Բարթելսին:
Շնորհավորելով դեսպանին մեր երկրում իր դիվանագիտական առաքելությունն սկսելու առթիվ, վարչապետը հույս հայտնեց, որ անցած տարիներին հայ-գերմանական հարաբերություններում ստեղծված բարի ավանդույթները նույն հաջողությամբ կշարունակվեն: Նշելով, որ եվրոպական երկրների հետ ինտեգրացումը Հայաստանի արտաքին քաղաքականության առաջնայնություններից է, Անդրանիկ Մարգարյանը կարևորեց, մասնավորապես, Գերմանիայի հետ մեր հանրապետության հարաբերությունների հետագա զարգացումը, մանավանդ որ վերջին շրջանում նկատելի է այդ երկրի քաղաքական և տնտեսական հետաքրքրությունների աճ հարավկովկասյան տարածաշրջանում: Ըստ վարչապետի, Հայաստանն ու Գերմանիան ունեն քաղաքական, տնտեսական, մշակութային և այլ բնագավառներում երկկողմ կապերի զարգացման զգալի ներուժ: Նշելով, որ Հայաստանի համար ընդունելի է տարածաշրջանում հավասարակշռված քաղաքականություն վարելու Գերմանիայի դիրքորոշումը, Անդրանիկ Մարգարյանը հույս հայտնեց, որ նման մոտեցումը կնպաստի ապահովելու տարածաշրջանի բոլոր երկրների մասնակցությունը Հարավային Կովկասում կայունության հաստատմանը, այնտեղ իրականացվող ծրագրերին, որոնք հովանավորվում են նաև Գերմանիայի կողմից:
Դեսպան Հանս-Վուլֆ Բարթելսը հավաստեց, որ անկախացումից հետո անցած տասը տարիներին Գերմանիան մշտապես աջակցել — առաջիկայում աջակցելու է եվրոպական երկրների ընտանիքին ինտեգրվելու Հայաստանի ջանքերին: Հաստատելով տարածաշրջանում հավասարակշռված քաղաքականություն վարելու Գերմանիայի դիրքորոշումը, դեսպանը նշեց, որ իր երկիրը մտադիր է շարունակել ջանքերը նաև ԵԱՀԿ Մինսկի խմբի շրջանակներում ղարաբաղյան հիմնախնդրի խաղաղ կարգավորման ուղղությամբ: Նա նույնպես կարևոր համարեց երկու երկրների միջև տնտեսական հարաբերությունների հետագա զարգացումը, նշելով, որ բոլորովին վերջերս Հայաստան է ժամանել գերմանական մի շարք առաջատար ընկերությունների ներկայացուցիչների պատվիրակություն՝ ներդրումների պայմաններին տեղում ծանոթանալու և գործարար կապեր հաստատելու նպատակով: Ըստ դեսպանի, ապրիլի վերջերին Հայաստան կժամանի գերմանական մեկ այլ խոշոր պատվիրակություն —ս:
