ուրբաթ, 28 դեկտեմբերի 2007
Այսօր ՀՀ վարչապետ Սերժ Սարգսյանը երիտասարդ «նախարարների» մասնակցությամբ հրավիրել է ՀՀ «կառավարության նիստ»` շարունակելու ս.թ. նոյեմբերի 16-ին ընդմիջված նիստի օրակարգային հարցերի քննարկումը:
Վարչապետն առաջարկել է շարունակել զրույցը մեր երկրի զարգացման ուղիների և այն գերակայությունների վերաբերյալ, որոնք դրված են ՀՀ կառավարության ծրագրի ու 2008թ. ՀՀ պետական բյուջեի հիմքում: Ըստ այդմ, օրակարգում ընդգրկվել է չորս հարց`
1.արդյունաբերության, գյուղատնտեսության և շինարարության արդիականացման խնդիրների լուծում, տնտեսության արդիականացում,
2. ֆինանսական միջնորդության զարգացում,
3. անվտանգության ժամանակակից և էֆեկտիվ համակարգի ձևավորում,
4. հանրապետական և տարածքային կառավարման արդյունավետության բարձրացում:
Նախորդ նիստի ժամանակ վերչապետ Սերժ Սարգսյանը նշել էր, թե կհանձնարարի կառավարության անդամներին` հանդիպել ուսանող «նախարարների» հետ և հաջորդ նիստի համար հնարավորինս լավ նախապատրաստել զեկուցուցվելիք հարցերը: Այսօր նա հույս է հայտնել, որ երիտասարդ «նախարարների» հանդիպումն իրենց գործընկեր նախարարների հետ արդյունավետ է անցել` հնարավորություն ընձեռելով լիարժեք պատկերացնելու ասօրվա նիստում ներկայացվելիք հարցերը, որոնք զեկուցել են ՀՀ առևտրի և տնտեսական զարգացման, գյուղատնտեսության, քաղաքաշինության, ֆինանսների և էկոնոմիկայի, պաշտպանության, տարածքային կառավարման «նախարարները»` ներկայացնելով ե՛ւ այդ ոլորտներում ներկայում իրականացվող քաղաքականությունը, ե՛ւ իրենց պատերացումները որոշակի խնդիրների լուծման հարցում:
Վարչապետ Սերժ Սարգսյանը երիտասարդ «նախարարներին» շնորհակալություն է հայտնել «նիստին» լավ նախապատրաստվելու համար, նաև պարզաբանել բարձրացված խնդիրների վերաբերյալ կառավարության մոտեցումներն ու որդեգրած քաղաքականությունը:
Տարեվերջյան «նիստն» ավարտելով` Սերժ Սարգսյանը հաջողություններ է մաղթել երիտասարդ «կառավարության անդամներին», ցանկանալով, որ եկող տարում նրանք իրականություն դարձնեն իրենց ամենահամարձակ նպատակները և դրանց հասնելու համար լինեն նախաձեռնող, տոկուն, միաժամանակ` հավատով լեցուն ու վստահ, որ յուրաքանչյուր տարի ապրելու են շատ ավելի լավ ու բարեկեցիկ երկրում, քան նախորդ տարի:
