ուրբաթ, 28 դեկտեմբերի 2007
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Սիմոն Տեր-Սիմոնյանը:
Հանձնաժողովը քննարկել է 9 բարեգործական ծրագիր: Մասնավորապես, քննարկվել և հաստատվել են «Հայաստան» համահայկական հիմնադրամի կողմից իրականացվող «Երևանի «Քանաքեռ-Զեյթուն» բժշկական կենտրոնի երեք սենյակների հիմնանորոգման աշխատանքների կատարում» ծրագիրը, Ամերիկայի «Հայ օգնության ֆոնդ» բարեգործական կազմակերպության Հայաստանի մասնաճյուղի կողմից իրականացվող «Բարեգործական ճաշարաններ», «Կրթական», «Բժիշկների վերապատրաստում», «Գիտական դրամաշնորհներ», «Ոսկրածուծի դոնորների հայկական ռեեստր» բարեգործական հիմնադրամի կողմից 2008-2010 թվականներին իրականացվող «Արյան ցողունային բջիջների հավաքման և պահպանման կենտրոնի ստեղծում», «Քրիստոնեական մշակութային միջազգային ծառայություններ» բարեգործական հասարակական կազմակերպության կողմից 2008-2009 թվականներին իրականացվող «Կոշիկի տուփ» ծրագրերը:
«Օթևան» երիտասարդական մարդկանց քրիստոնեական ասոցիացիա» հասարակական կազմակերպության կողմից 2007-2008 թվականներին իրականացվող ծրագրի նպատակն է Նոր Նորքի համայնքի ուսանողական հանրակացարանի վերանորոգման աշխատանքների իրականացում 17 վերանորոգված սենյակները օգտագործվելու են որպես Հայաստանում ապաստան հայցողների կացարան:
«Ընտանիք» բարեգործական հասարակական կազմակերպության կողմից իրականացվող ծրագիրը նպատակ ունի վերանորոգելու Գյումրիում գտնվող «Ընտանիք» մանկապատանեկան ստեղծագործական կենտրոնը:
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր:
