չորեքշաբթի, 27 մարտի 2002
Այսօր ՀՀ վարչապետ Անդրանիկ Մարգարյանն ընդունեց ԱՄՆ Կալիֆորնիայի նահանգի սենատոր Ջեկ Սքոտին և նրա գլխավորած պատվիրակությանը, որի կազմում էին սենատորի տիկինը՝ Լաքրետա Սքոտը, Ամերիկայի Հայ Դատի հանձնախմբի աշխատակիցներ Պերճ Կարապետյանը և Արթին Մանուկյանը:
Նշելով, որ սա իր առաջին այցելությունն է Հայաստան և շնորհակալություն հայտնելով բոլոր պաշտոնական հանդիպումների ժամանակ պատվիրակությանը ցույց տրված ջերմ ընդունելության համար, սենատորն իր պատրաստակամությունը հայտնեց հայ-ամերիկյան քաղաքական ու տնտեսական հարաբերւոթյունների զարգացմանն աջակցելու, մասնավորապես Հայաստանում Կալիֆորնիայի նահանգի առևտրատնտեսական գրասենյակ հիմնելու վերաբերյալ: Ըստ նրա, նկատի ունենալով Հայաստանում այսօր առկա տնտեսական աշխուժությունը, Կալիֆորնիայի նահանգը և Հայաստանը կարող են մեծ արդյունավետությամբ համագործակցել հատկապես բարձր տեխնոլոգիաների, գյուղատնտեսության, կրթության, սեյսմիկ պաշտպանության և այլ բնագավառներում:
Վարչապետ Անդրանիկ Մարգարյանը նշեց, որ ողջունում է Հայաստանի և Կալիֆորնիայի նահանգի միջև քաղաքական, տնտեսական ու առևտրական ցանկացած նախաձեռնություն, որն ուղղված է փոխշահավետ գործնական հարաբերությունների հետագա զարգացմանը: Հիշեցնելով, որ անցած տարվա նոյեմբերին Կալիֆորնիայի նահանգի պատվիրակության հետ հանդիպումից հետո կարճ ժամանակամիջոցում նահանգի ու Հայաստանի միջև արդեն իսկ ստորագրվել է փոխըմբռնման հուշագիր՝ առևտրատնտեսական կապերի զարգացման վերաբերյալ, կազմակերպվել և նախատեսվում են տարաբնույթ գործարար համաժողովներ և ցուցահանդեսներ, վարչապետը համոզմունք հայտնեց, որ սենատորի այս առաջարկը ևս հաջողություն կունենա, կնպաստի հայ-ամերիկյան քաղաքական ու տնտեսական կապերի էլ ավելի սերտացմանը:
Վարչապետը նշեց նաև այն կարևոր աջակցությունը, որ ցուցաբերում են ԱՄՆ-ի և մասնավորաբար Կալիֆորնիայի իշխանությունները ամերիկահայության ազգային, մշակութային նախաձեռնություններին, առանձնակի ընդգծելով նրանց ջանքերը Հայ Դատի, Հայոց ցեղասպանության միջազգային ճանաչման ուղղությամբ:
