հինգշաբթի, 29 նոյեմբերի 2007
ՀՀ վարչապետ Սերժ Սարգսյանն այսօր կառավարությունում հյուրընկալել է արտերկրից Հայաստան ժամանած լրագրողների պատվիրակությանը, որոնք ներկայացնում են մի շարք երկրներ` Ռուսաստանի Դաշնություն, Բելառուս, Ուկրաինա, Ղազախստան, Լատվիա, Լիտվա, Մոլդովա, Չինաստան: Հանդիպման ժամանակ լրագրողները ՀՀ կառավարության ղեկավարին ուղղել են ամենատարբեր թեմաներով բազմաթիվ հարցեր: Դրանք, մասնավորապես, վերաբերել են իրենց երկրների հետ Հայաստանի հարաբերությունների ներկայիս մակարդակին, այդ հարաբերությունների հետագա խորացման և ամրապնդման հեռանկարներին, Հայաստանի տնտեսությանն ու ՀՀ կառավարության առաջիկա ծրագրերին, Իրան-Հայաստան գազատարի շահագործման խնդիրներին և հայ-իրանական հարաբերություններին, ԵՄ-ի և ՆԱՏՕ-ի հետ Հայաստանի Հանրապետության համագործակցությանը, ԼՂ հակամարտության կարգավորման գործընթացին ու այդ համատեքստում ադրբեջանական ռազմատենչ հայտարարությունների, այդ թվում` պատերազմի 100 տոկոս հավանականության մասին Ադրբեջանի պաշտպանության նախարարի կանխատեսումների վերաբերյալ ՀՀ վարչապետի տեսակետին: Վերջինիս հետ կապված, Սերժ Սարգսյանը ևս մեկ անգամ վերահաստատել է Հայաստանի դիրքորոշումը, ընդգծելով, որ ԼՂ հակամարտությունը ռազմական ճանապարհով լուծում չունի: ՀՀ զինված ուժերը, ՀՀ վարչապետի հավաստամամբ, մշտապես պատրաստ են մեր պետության սահմանները պաշտպանելու, և ադրբեջանական կողմը պետք է նկատի առնի, որ հարցի լուծման ռազմական ճանապարհը նախընտրելու դեպքում, ստիպված կլինի այնուհետ ավելի բարդ խնդիրներ լուծել, քան հիմա:
Օտարերկրյա լրագրողները Սերժ Սարգսյանին հարցեր են ուղղել նաև Հայաստանում առաջիկա նախագահական ընտրությունների վերաբերյալ:
Հանդիպման ավարտին վարչապետ Սերժ Սարգսյանը հաջողություններ է մաղթել լրագրողներին, հույս հայտնելով, որ Հայաստանից կմեկնեն մեր երկրի ու ժողովրդի մասին լավագույն տպավորություններով:
