երեքշաբթի, 19 մարտի 2002
Մարտի 18-ին Մեքսիկայի Միացյալ նահանգների Մոնթերեյ քաղաքում աշխատանքն սկսեց «Զարգացման ֆինանսավորում» միջազգային համաժողովը: ՄԱԿ-ի նախաձեռնությամբ անցկացվող այս միջոցառմանը բազմաթիվ երկրներ ներկայացել են բարձր մակարդակով: Համաժողովին մասնակցում են 40 երկրների նախագահներ, 18 երկրների վարչապետներ, մեծ թվով նախարարներ, որոնք ներկայացնում են ֆինանսական, առևտրի, արտաքին գործերի բնագավառները:
Համաժողովի լիագումար նիստի առաջին կեսին տեղի ունեցավ նախագահողի ընտրությունը: Ըստ այդմ, նախագահ ընտրվեց Մեքսիկայի նախագահ Վեսենտե Ֆոքսը: Օրակարգի հարցերի հաստատումից և կազմակերպչական խնդիրների քննարկումից հետո, մասնակիցներն անդրադարձան առանձին փուլերով՝ բարձր պաշտոնյաների, նախարարների, երկրների ու կառավարությունների ղեկավարների մակարդակով անցկացվելիք նիստերի աշխատանքի կազմակերպմանը:
Օրվա առաջին կեսի նիստը, որ անցկացվեց բարձր պաշտոնյաների մակարդակով (Հայաստանի պատվիրակությունից մասնակցում էր դեսպան Աշոտ Մելիք-Շահնազարյանը); հավանության արժանացրեց համաժողովի կոնսենսուսային ամփոփիչ փաստաթղթի նախագիծը: Այն այնուհետև քննարկման ներկայացվեց նույն օրը նախարարների մակարդակով անցկացված երկրորդ նիստում, որտեղ համաժողովի թեմայի շրջանակներում կարծիքներ փոխանակվեցին աշխարհում աղքատության վերացման, տնտեսական ինտեգրացման, զարգացող և աղքատ երկրներին աջակցության ուղիների վերաբերյալ: Լսվեցին միջկառավարական և միջազգային տնտեսական, ֆինանսական, առևտրական, արժութային կազմակերպությունների և ՄԱԿ-ի համապատասխան մարմինների ներկայացուցիչների ելույթները: Նիստը վարում էր համաժողովի փոխնախագահներից Խորխե Կաստանեյդան, որը Մեքսիկայի արտաքին գործերի նախարարն է:
Ընդհանուր առմամբ, համաժողովի ընթացքում կանցկացվեն 6 լիագումար նիստ և 12 ինտերակտիվ կլոր սեղան:
